Qarabağdakı antiterror tədbirləri Cənubi Qafqazda yeni reallıqlar yaradıb - Komitə sədri
Mətn ölçüsü:
  • 100%

Qarabağdakı antiterror tədbirləri Cənubi Qafqazda yeni reallıqlar yaradıb - Komitə sədri

“Azərbaycanın Qarabağda həyata keçirilən lokal antiterror tədbirləri Cənubi Qafqazda yeni reallıqlar yaradıb. Artıq bölgədə proseslər yeni reallığın şərtlərinə uyğun şəkildə inkişaf etməkdədir. Beynəlxalq aləm  və dünya birliyi də bu reallığa uyğun siyasətini və addımlarını uyğunlaşdırımaqdadır”.

 Bunu “Ölkə.Az”a açıqlamasında Milli Məclisin iqtisadi siyasət, sənaye və sahibkarlıq komitəsinin sədri Tahir Mirkişili deyib.

Komitə sədrinin fikrincə, Azərbaycanın son məhdud xarakter daşıyan lokal antiterror tədbirlərinə əl atması Ermənistanın İkinci Qarabağ müharibəsindən sonra  sülh sazişi ilə bağlı üzərinə götürdüyü öhdəlikləri yerinə yetirməməsi və  sülh prosesinin pozulması istiqamətindəki yürütdüyü pozucu siyasəti oldu: “Rəsmi İrəvan Qarabağ, 8 anklav daxil  olmaqla Azərbaycanın ərazi bütövlüyünü tanıyıb sülhə hazır olduğunu bəyan etsə də, realda verdiyi bəyanatların tam əksi istiqamətdə təxribatçı hərəkətlərlə məşğul oldu.  Yenə də Azərbaycanı daxili işlərinə müdaxilə etməkdə və Xankəndidəki terrorçu ünsürlərə istər maliyyə, istər silah-sursat, istərsə də  hərtərəfli mənvi dəstək verdi. Təkcə 10 noyabr 2020-ci ildə imzalanmış Üçtərəfli bəyanatdan keçən üç il ərzində Ermənistan tank və digər zirehli texnikalar, artilleriya qurğuları, çoxlüləli raket sistemləri, minaatanlar, elektromaqnitik döyüş vasitələri və digər hücum vasitələri kimi ağır silahlarla təchiz olunmuş 10 min nəfərdən artıq silahlı birləşmələri Azərbaycan ərazisində saxlamaqda davam etdi. Lakin Üçtərəfli bəyanatın bəndlərinə əsasən  qısa zaman ərzində Ermənistan həmin qeyri-qanuni hərbi birləşmələri Azərbaycandan çıxarmalı  idi. Düzdür, bu  Üçtərəfli bəyanatın icrasına qarant ölkə kimi Rusiyanın da üzərinə düşən vəzifəni yerinə yetirməyib. Son aylarda Azərbaycana qarşı “blokada”, “aclıq” adı altında təxribat həyata keçirib beynəlxalq aləmi bu prosesə cəlb edib Azərbaycana qarşı təzyiqlərə cəhd etdi. Ən sonuncu isə Azərbaycan ərazisindəki qondarma qurumun “ildönümü” ilə bağlı “təbrik mesajı” göndərməsi, qondarma qurumun “prezident seçki”ləri Azərbaycanın səbr kasasını doldurdu.  Baxmayaraq Azərbaycan Prezidenti cənab İlham Əliyev İrəvanı və onun havadarlarını xəbərdar edərək bəyan etmişdi ki,  bu təxribatlar onlara çox baha başa gələcək. Lakin onlar bu xəbərdarlıqlardan nəticə çıxarmadı. Əksinə yeni-yeni təxribatlara əl atmağa cəhd etdilər və 19 sentyabrda tördilən mina terroru  Azərbaycanı sərt addımlara atmaq məcburiyyəti qarşısında qoydu.  Müzəffər Ali Baş Komandanın tapşırığı əsasında Azərbaycan ordusu ən müasir hərb taktikasından yüksək peşəkarlıqla  istifadə etməklə mülki insanlara, obyektlərə zərər vurmadan 15-20 saat ərzində düşməni məğlubiyyətə uğradıb növbəti kapitulyasiyaya vadar etdi. Erməni Bakının şərtlərini qəbul edib danışıqlara razı oldu. Yevlaxda Qarabağın erməni icması ilə görüşün keçirilməsi Azərbaycanın Cənubi Qafqazda yaratdığı yeni reallığın təzahürü idi. Bu reallıq özünü sentyabrın 21-də BMT Təhlükəsizlik Şurasının məlum iclasında da özünü sübuta yetirdi. Məhz Azərbaycanın yürütdüyü uğurlu diplomatiya öz bəhrəsini verdi. Ermənilər və onların havadarları növbəti dəfə mənəvi cəhətdən məğlubiyyətə uğrayıb, planları puça çıxdı”.

Deputat bildirib ki, hazırda  proseslər  yeni reallığın şərtlərinə uyğun olaraq inkişaf edir: “Qarabağdakı erməni icmasının reinteqrasiyasi istiqamətində kompleks tədbrilər planın həyata keçirilməsi və oradakı qeyri-qanuni hərbi birləşmələrin, terrorçuların silahsızlaşdırılması istiqamətində ciddi işlər gedir. Azərbaycan Qarabağdakı erməni icmasının ölkə vətəndaşlığını qəbul edib digər vətəndaşlatra verilən hüquqlar əsasında ölkəmizdə yaşamalarında maraqlıdır və buna çalışır. Kim istəyəcəksə bu şərtləri qəbul edib Azərbaycanda təhlükəsiz həyatını davam etdirəcək və bunda hər hansı problem olmayacaq. Artıq erməni icmasının  zəruri ehtiyaclaırnı ödəmək üçün ilkin humanitar yük də Xankəndinə göndərilib. Bakı Qarabağdakı erməni icmasının ehtiyaclarını yerində öyrənib ona uyğun lazımi addımlarını atacaq. Bu istər qida, istər dərman, istər müalicə, istərsə də digər sosial-iqtisadi, ifrastruktur, humanitar  məsələlərlə bağlı işlər görüləcək”.

Komitə sədri hesab edir ki, artıq  Ermənistan və onun havadarları baş verənlərdən nəticə çıxarıb yeni reallığın qaydalarına uyğun olaraq konkret addım atsalar yaxşı olar: “Məsələnin həlli nəinki region ölkələrinin, o cümlədən bölgədə marağı olan dövlətlərin və güclərin marağına uyğundur.  Bakının şərtləri əsasında sülh sazişi ilk növbədə isə Ermənistanın  marağına xidmət edir. Çünki Azərbaycanla sülhün olmaması İrəvana  siyasi qərarlar verməsində və addımlar atmasında ciddi əngəllər yaradırdı. 
Digər xüsusi məqam ondan ibarət idi ki,  İrəvanın Bakı ilə sülh imzalamaması onu müttəfiqlərindən belə təcrid vəziyyətə salırdı. 

Burada onu da xüsusi ilə qeyd etmək lazımdır ki,  Azərbaycan Prezidentinin dünyada gedən geosiyasi prosesləri düzgün analiz edib, ona uyğun çevik siaysət yürütməsi  proseslərin Bakının xeyrinə dəyişməyə vadar etdi. Nəticədə Ermənistan bölgədə bütün mənalarda cəlbedici olmayan  mənasız bir ölkəyə çevrildi. Fakt odur ki, özlərini Ermənistanın müttəfiqi və havadarı olan ölkələr belə İrəvanla deyil, Azərbaycanla əməkdaşlığı inkişaf etdirməyə üstünlük verdilər.  İstənilən transmilli və iri regional iqtisadi layihələr Azərbaycanla  birlikdə icra edildi. Ermənistan isə bu layihələrdən kənarda qaldı. Bütün bunlar Azərbaycan Prezidentinin yürütdüyü düzgün siyasəti nəticəsində müstəqilliyin ilk günlərindən ölkənin üzləşdiyi ən aktual geosiyasi problemi həll etməyə imkan verdi. Çünki cənab Prezident özünün dediyi kimi, “nəyin və nə vaxt ediləcəyini mən bilərəm” prinsipi ilə geosiyasi prosesləri zərgər dəqiqliyi ilə hesablayıb ona uyğun addımlar atdı və atılan düzgün addımlar da  qələbələrlə sonuclandı. Məhz cənab Prezidentin belə geosiyasi prosesləri zərgər dəqiqliyi ilə hesablayıb düzgün addım atması hesabına 100 illik Qarabağ kimi mürəkkəb bir problem artıq final mərhələyə qədəm qoyubvə tezliklə  tamamilə tarixin arxivinə  qovuşacaq. Azərbaycanın son iki yüz ildən artıq müddətdə belə uğurlu qələbələr əldə etməsinin səbəbi bundadır. Bu da Azərbaycanın nəinki  Cənubi Qafqazda, o cümlədən bütövlükdə Avrasiya coğrafiyasında statusunu yüksəldib ciddi aktor ölkəyə çevirəcək. Bununla da bölgədə yeni reallığın qaydalarına uyğun olaraq inkişaf və əməkdaşlıq mərhələsi başlayacaq. Ümumiyyətlə cənab Prezident geosiyasi proseslərdəki oyunlarda Azərbaycanın milli və dövlətçilik maraqlarına uyğun oyun qurub qələbə çalıb inkişafa doğru aparmağı bacaran bir LİDERdir.  Onun bu liderlik qabliyyəti nəticəsində Azərbaycanın xeyrinə olmayan geosiyasi oyunları və prosesləri  pozub, ölkəmizin xeyrinə yönəldildi. Yaranmış bu reallıqlar da bunun nəticəsidir. Bu da öz növbəsində Azərbaycanın bir dövlət kimi dünyada güclənməsinə, nüfuzlu, inkişaf etmiş, xalqının sosial rifah halında yaşayan bir ölkəyə çevrilməsi ilə sonuclanacaq. Və həmin gün elə  də uzaqda deyil”.

Mürtəza
Ölkə.Az