Bakının qətiyyəti, Xankəndidəki cinayətkar rejimin özünü buraxması
“Bu gün sözün hər mənasında Azərbaycan tarixi anlar yaşayır. Bu gün Azərbaycan cənab Prezidentin müdrik, uzaqgörən və qətiyyətli siyasəti nəticəsində on illərlə Azərbaycana və azərbaycanlılara qarşı törədilən işğalçılıq, soyqırımı, terror siyasətinə son verib möhtəşəm tarixi qələbələrə imza atır. Belə bir qələbələrə şahidlik etməyi və onu yaşamağın sevincini sözlə ifadə etmək qeyri-mümkündür”.
Bunu “Ölkə.Az”a açıqlamasında deputat Şahin İsmayılov deyib.
Onun sözlərinə görə, havadarlarının ermənilərə və Ermənistana verdiyi hərtərəfli dəstəklərə baxmayaraq Azərbaycan onların bütün oyunlarını pozaraq öz gücü ilə ermənilər və havadarları üzərində qələbə çaldı.
“30 ilə yaxın müddətində Ermənistanın Azərbaycana qarşı işğalçılıq siyasətinə son verilməsi üçün nə beynəlxalq təşkilatların, nə də ATƏT-in Minsk qrupunun səyləri nəticə vermədi. Azərbaycan nəhayətində anladı ki, bu münaqişəni nə beynəlxalq təşkilatlar, nə də ATƏT MQ-da təmsil olunan Qərb ölkələri ilə Rusiya həll etməyəcək. Onların əsas hədəfi sadəcə Cənubi Qafqazda maraqlarını təmin etmək və bunun uğrunda rəqabət aparmaqdır. Ona görə də Azərbaycan qərara aldı ki, münaqişənin öz gücü ilə həllinə nail olsun”, - o qeyd edib.
Deputat əlavə edib ki, cənab Prezident İlham Əliyev Ermənistan-Azərbaycan münaqişəsini öz gücü ilə həll etməsi, dövlətin güclənməsi və buna nail olması məqsədi ilə çoxşaxəli diplomatik, iqtisadi, ordu quruculuğu, informasiya siyasəti istiqamətində uğurlu addımlar həyata keçirdi: “Cənab Prezident yürütdüyü uğurlu siyasət nəticəsində qısa zaman ərzində bölgədəki geosiyasi prosesləri Azərbaycanın xeyrinə dəyişə bildi. Geosiyasi proseslərin Azərbaycanın xeyrinə dəyişməsi, üstəgəl iqtisadi, ordu cəhətdən güclənməmiz Ermənistan işğalına son vermək üçün bütün zəruri zəminləri yaratdı. Azərbaycan Ermənistanda hər cəhətdən güclü olsa da, münaqişəni yenə də sülh yolu ilə həllinə üstünlük verdi və hər an buna sadiq qaldı. Lakin Ermənistan tərəfi hər zaman destruktiv mövqe sərgiləyib sülhdən yayındı və sülh prosesini pozdu. Nəticədə Azərbaycan 2020-ci ilin sentyabrın 27-də Ermənistanın növbəti təxribatlarının qarşısını amaq məqsədi ilə “Dəmir yumruq” əməliyyatına başladı və 44 günə düşməni diz çökdürüb kapitulyasiya aktını imzalamağa vadar etdi. Azərbaycan öz ərazi bütövlüyünü təmin etdi. 10 noyabr 2020-ci il bəyanatı imzalandı. Bəyanatda ən qısa zamanda sülh sazişinin imzalanması və Qarabağda yaşayan ermənilərin Azərbaycan cəmiyyətinə reinteqrasiyası məsələsi əksini tapdı. Lakin ermənilər yenə də sülh prosesi ilə bağlı üzərlərinə götürdükləri öhdəliklərini yerinə yetirmək əvəzinə havadarlarına arxalanaraq sülh danışıqlarını pozmaq istiqamətində təxribatlarını davam etdirdilər. Azərbaycana yenə də sərt addımlar atmaqdan başqa variant qoymadılar. Nəticədə Azərbaycan sentyabrın 19-da Qarabağda lokal antiterror tədbriləri keçirmək məcburiyyətində qaldı. Düşmənə 15-20 saat ərzində diz çökdürüldü. Xankəndidəki cinayətkar xunta rejimi Bakının şərtlərini qəbul edib təslimçiliyə razı oldu. Erməni tərəfinin indiyədək törətdiyi cinayətlərə baxmayaraq, Azərbaycan yenə də sülh əlini uzadaraq Qarabağ bölgəsində yaşayan erməni icmasına öz dəstəyini göstərdi. Onların Azərbaycan cəmiyyətinə inteqrasiyasi üçün zəruri addımlar atmaqdadır. Cənab Prezidentin yürütdüyü müdrik siyasət nəticəsində isə bu gün Xankəndidəki xunta rejimi özünü buraxmaq barədə sənəd imzaladı. Bununla da bünövrəsi 100 il əvvəl, 1923-cü ildə Azərbaycan dövlətçiliyinə hər zaman təhlükə yaradan mürəkkəb bir problemə 2023-cü ildə son qoyuldu. Bu, Azərbaycan müasir tarixində görünməmiş qələbəsidir. Məhz bütün bu qələbələr Azərbaycan Prezidentinin qətiyyətli, cəsarətli, uzaqgörən siyasətni nəticəsində mümkün oldu, xəyallarımız gerçəkləşdi”.
Mürtəza
Ölkə.Az
