Abbas Abbasovun yaxın adamı, uşaq yeməyi satan, jurnalistlərin tanımadığı deputat

Ölkə.Az Milli Məclis üzvləri ilə bağlı silsilə yazılarını davam etdirir

Növbəti yazımız 77 saylı Astara seçki dairəsinin deputatı Aslan Cəfərov barədədir. Yəqin ki, bu ad sizə heç nə demədi. Elə bir neçə gün öncə jurnalistlər arasında keçirilən sorğudan da məlum olmuşdu ki, Cəfərovu nəinki seçicilər, hətta mətbuat nümayəndələri də doğru-dürüst tanımırlar. Bu arada xatırladaq ki, Aslan Cəfərovun namizədliyi 2010-cu ildə Yeni Azərbaycan Partiyası tərəfindən irəli sürülmüşdü. Deputat mandatı daşıdığı beş il ərzində Cəfərovun parlamentdə hər hansı çıxışını, təşəbbüsünü, təklifini eşidən olmayıb. Əgər A.Cəfərov belə bir təşəbbüslə çıxış edibsə də, bunu Milli Məclisdə etməyib.

A.Cəfərov biznesmen deputatlardan hesab olunur. 77 saylı Astara seçki dairəsinin deputatı "Diplomat" firmasının sahibidir. Firma ölkəyə Avstriya və Almaniyadan uşaq qidalarını (xüsusən "Hipp" uşaq qidası) gətirməklə məşğuldur. Hazırda isə firmanı onun atası Məmmədhüseyn Cəfərov idarə edir. "Diplomat" firması barədə ətraflı bir qədər sonra...

Ümumiyyətlə, Cəfərovlar ailəsi Bakı şəhərində bir neçə biznes qurumuna sahibdir. Əldə etdiyimiz məlumata görə, deputat Lökbatan qəsəbəsi ərazisində böyük obyekt tikdirir. Ancaq hələlik bu obyektin istifadəsinə razılıq verilib-verilməyəcəyi sual altındadır. Bunun da müxtəlif səbəbləri var.

Birincisi, Cəfərov bu obyekti deputat olduğu müddətdə tikdirib və sahib olduğu səlahiyyətdən seçiciləri üçün deyil, məhz öz biznes imkanlarını genişləndirmək üçün yararlanıb. Yəni mandat əldən çıxandan sonra A.Cəfərovun həmin obyekti işlədə biləcəyi sual altındadır.

Digər tərəfdən, Cəfərovların baş nazirin keçmiş birinci müavini Abbas Abbasovla qohumluq əlaqələri var. Abbas Abbasovun ətrafında baş verənləri isə geniş təhlil etməyə ehtiyac yoxdur.

Onun Yeni Azərbaycan Partiyasının namizədlər siyahısında olmaması da hakimiyyətin ona etimad limitinin tükəndiyi anlamına gəlir. Hesab olunur ki, A.Cəfərov parlamentdən kənarda qalmaqla yanaşı, obyektlərini də itirə bilər. Yeri gəlmişkən qeyd edək ki, A.Cəfərov Milli Məclisin İqtisadi Siyasət Komitəsinin üzvüdür.

İndi isə Cəfərovların sahib olduğu "Diplomat" firması barədə daha ətraflı. Firma uşaq qidalarını Azərbaycana ilk gətirənlərdən hesab olunur. Ancaq son illər rəqabətə dözməyərək həkimləri müxtəlif yollarla stimullaşdırır, hətta bayramlarda hədiyyələr, yeni anadan olmuş körpəyə "Hipp" qidasının yazılmasına görə 20-30 manat rüşvət (hər uşağa görə) verilir. Hətta xəstəxanaların baş həkimləri də "Diplomat"ın bu "səxavətindən" kənarda qalmırlar. Çünki firmanın əməkdaşlarının xəstəxanalara "yol tapması" məhz baş həkimlərin icazəsindən sonra gerçəkləşir.

Bir ananın müsahibəsindən:

"Xəstəxanadan gələndən sonra “Hipp” uşaq qidalarının satışı ilə məşğul olan firmadan evimizə zəng gəldi və uşağın nə ilə qidalandığını soruşdular. Mənə və digər analara da doğum evində məsləhət görülürdü ki, uşağa “Hipp” verək. Maraqlıdır ki, “Hipp”dən nə bilirdilər ki, mən ana olmuşam, yaxud telefon nömrəm onlarda nə gəzirdi? Buradan belə çıxır ki, xəstəxanadan mənim və digər anaların da ev nömrələrini “Hipp”ə verirlər. Bu da doğum evləri ilə süni uşaq qidaları satışı ilə məşğul olanların əlbir işləməsinə işarə deyilmi? Çünki mənim yatdığım doğum evində doğuş keçirən rəfiqəmə də eyni şirkətdən telefon zəngi gəlmişdi. Mənim və digər anaların da bir əlacı qalır ki, xəstəxananı məhkəməyə verək".

Hər halda bütün bunlar beş il ərzində Astara sakinlərinə vəkillik etməli olan Aslan Cəfərov haqda öyrənə bildiklərimiz idi. "Diplomat" firması və "Hipp" barədə isə daha geniş materialımızı yaxın günlərdə saytımızdan oxuya bilərsiniz.

Ölkə.Az