Qüdrət Həsənquliyev inhisarçılıqla mübarizədə çoxpartiyalılıq prinsipini təklif etdi

“Haqsız rəqabətin ən böyük forması elə inhisarçı fəaliyyətə, inhisarçı mövqeyə malik olmaqdır. Elə bir mexanizm yaratmalıyıq ki, iqtisadiyyatın əsas sahələrində rəqabət yaradılsın”

Ölkə.Az xəbər verir ki, bunu deputat Qüdrət Həsənquliyev parlamentdə Rəqabət Məcəlləsinin müzakirəsi zamanı deyib.

“Mərhum prezident Heydər Əliyevin məşhur bir sözü var idi. Deyirdi ki, “iqtisadiyyatı güclü olan dövlət hər şeyə qadirdir”. “Möhtəşəm qələbəni də məhz Ermənistanla müqayisədə daha güclü iqtisadi potensiala malik olmağımıza görə əldə edə bilmişik. Sözsüz ki, həm də düzgün xarici siyasət yürütməklə”, - o qeyd edib.

Əlavə edib ki, bizim iqtisadiyyatımız neft sektorundan çox asılıdır: “Son illər İqtisadiyyat Nazirliyinin qeyri-neft sektorunun inkişafı istiqamətində atdığı addımları şəxsən yüksək qiymətləndirirəm. “Rəqabət Məcəlləsi”ni də təqdir edirəm və işçi qrupun üzvlərinə öz minnətdarlığımı bildirirəm. Amma bir neçə təklifim var. Birincisi, 8-ci maddə ilə bağlıdır - rəqabət orqanı. Hörmətli Tahir Mirkişili öz çıxışında rəqabət komissiyasının formalaşması ilə bağlı qeyd elədi. Ümumiyyətlə, hesab edirəm ki, rəqabət orqanının özü çoxpartiyalılıq prinsipi əsasında Azərbaycan Respublikasının Prezidenti tərəfindən formalaşdırılmalıdır. Bu halda daha effektli fəaliyyət göstərə bilər. Bundan başqa yenə də Tahir müəllim bazarda hökmran mövqe ilə bağlı qeyd elədi ki, təsərrüfat subyekti 50 faizdən çox bazar payına malik olduqda o, hökmran mövqe tutmuş hesab olunur - 15-ci maddədə. Hesab edirəm ki, “Antiinhisar fəaliyyəti haqqında” qanunda biz qeyd eləmişik ki, təsərrüfat subyektinin bazarda payı 35 faizdən çox olmamalıdır. Yəni bunu da Tahir müəllimin dediyi kimi, 40 faiz yox, 35 faiz götürsək daha düzgün olar. Yəni faizləri eyniləşdirsək. Bundan başqa 19-cu maddədə haqsız rəqabətin formaları ilə bağlı fikrimi bildirmək istəyirəm. Biz bilirik ki, dəfələrlə hörmətli iqtisadiyyat naziri də öz çıxışlarında qeyd edib ki, Azərbaycanda iqtisadiyyatın əsas sahələri dövlətin nəzarətində, yaxud inhisarındadır. Burada haqsız rəqabətin formaları sadalanır. Amma haqsız rəqabətin ən böyük forması elə inhisarçı fəaliyyətə, inhisarçı mövqeyə malik olmaqdır ki, düşünürəm ki, bu da burada öz əksini tapmalıdır. Bu məcəllədə də elə bir mexanizm yaratmalıyıq ki, bu iqtisadiyyatın əsas sahələrində rəqabət yaradılsın. Yəni bunlar dövlətin mülkiyyətindədirlər. Bunlar ilk öncə özəlləşdirilməli, sonra isə bir neçə yerə parçalanmalıdır ki, onların bazarda payı 35 faizdən çox olmasın.  Demək istəyirəm ki, təkcə iqtisadi mexanizmlərlə qeyri-neft sektorunun sürətli inkişafına nail ola bilməyəcəyik. Mən vaxtilə mətbuatda da bu məsələyə diqqət yetirmişdim ki, Azərbaycanda ümumiyyətlə Cinayət Prosessual Məcəlləsinə dəyişiklik edilməlidir. Bu iqtisadi fəaliyyətlə əlaqədar olaraq cinayət işlərinin istintaqı, yaxud qanun pozuntuları ilə bağlı daxil olmuş məlumatların araşdırılması yalnız Vergilər Nazirliyinə həvalə olunmalıdır. Hüquq mühafizə orqanlarına bu barədə hər hansı məlumat daxil olarsa, onlar, o materialları iqtisadi sfera ilə birbaşa bağlı olan sahələrə göndərməlidirlər. Özləri bu sahədə araşdırmalar aparmamalıdırlar. Bundan başqa qaçaqmalçılıqla əlaqədar əgər hər hansı qanun pozuntuları ilə bağlı istənilən dövlət orqanlarına daxil olan məlumatlar isə Dövlət Gömrük Komitəsinə göndərilməlidir. Rusiyada artıq bu istiqamətdə qərar qəbul olunub. Bu istiqamətdə prezident tərəfindən müvafiq dövlət orqanlarına göstəriş verilib. Hesab edirəm ki, Azərbaycanda da belə bir addımın atılması iqtisadiyyatımızın inkişafına öz müsbət təsirini göstərə bilər”.

Mürtəza
Ölkə.Az