İlham Əliyev: İslam Həmrəylik Oyunlarında da xüsusi nəqliyyat zolaqları müəyyən edilməlidir
Avropa Oyunlarında informasiya-kommunikasiya sahəsində heç bir problem olmamışdır. İndi İslam Həmrəylik Oyunlarına qədər əlavə tədbirlər də görülməlidir ki, bütün informasiya-kommunikasiya sistemləri yaxşı vəziyyətdə işləsin və heç bir problem olmasın.
Bu sözləri Azərbaycan prezidenti İlham Əliyev 2017-ci ildə Bakıda keçiriləcək IV İslam Həmrəylik Oyunlarının Təşkilat Komitəsinin birinci iclası zamanı deyib.
Dövlət başçısı qeyd edib ki, şəhər nəqliyyatının tənzimlənməsi prosesi gedir, yeni qurumlar yaradılır, Bakı sakinləri də bunu görür, yeni metro stansiyaları inşa edilir.
“Şəhər nəqliyyatı ilə bağlı yeniliklər artıq tətbiq edilir. Hesab edirəm ki, Oyunlara qədər bu sahədə təkmilləşmə işləri daha da sürətlə getməlidir. Yenə də Avropa Oyunlarındakı kimi xüsusi nəqliyyat zolaqları müəyyən edilməlidir. Hesab edirəm ki, bu sahədə də heç bir problem olmayacaq”, - prezident İlham Əliyev bildirib.
Azərbaycan prezidenti həmçinin Bakı şəhərinin abadlaşması prosesi danıçıb.
“Bakı şəhərinin abadlaşması prosesi gedir. Bunun Oyunlarla heç bir əlaqəsi yoxdur. 2017-ci ilə qədər əlavə tədbirlər görüləcək. Bakıda yeni küçələr açılır, binalar tikilir, şəhər gözəlləşir. Göstəriş verilmişdir ki, şəhərimizin hər bir yerində çox ciddi və böyük quruculuq işləri davam etdirilsin. Bakı şəhəri təkcə mərkəzdən ibarət deyil, bütün mikrorayonlarda, şəhərimizin bütün kənar yerlərində də sürətlə quruculuq-abadlıq işləri, infrastruktur layihələri icra edilməlidir və edilir”, - dövlət başçısı əlavə edib.
Ölkə.Az
