Bu gün bir sıra təhsil müəssisələrində maaşlar çox aşağıdır - Ceyhun Məmmədov
"Bu ilin dövlət büdcəsindən bütün sahələrə o cümlədən təhsilə ayrılan vəsait artırılıb. Bu sahəyə böyük məbləğdə vəsaitin ayrılması heç şübhəsiz ki, dövlətimizin bu sahəyə xüsusi diqqət və qayğısının göstəricisidir. Bütün bunlarla yanaşı aşağıda qeyd olunan məsələlərin xüsusi diqqətdə saxlanılmasını təklif edirəm".
Ölkə.Az xəbər verir ki, belə bir təkliflə deputat Ceyhun Məmmədov parlamentdə çıxışı zamanı deyib.
"1. Ali təhsil müəssisələrinin adambaşına maliyyələşməsi sisteminə yenidən baxılması. Bu gün vəziyyət belədir. Universitetlər tələbədən təhsil haqqını alır və onun hesabına universitetləri saxlamağa çalışırlar. Belə olan halda universitetlər daha çox tələbə sayını artırmaq barədə düşünürlər.
2. Məktəblərin təmiri məsələsi. Son illər Prezident İlham Əliyevin və Birinci-vitse prezident Mehriban Əliyevanın bilavasitə diqqət və qayğısı ilə ölkəmizdə yüzlərlə məktəb inşa və təmir olunub. Ancaq bu gün ölkədə təxminən 800 məktəb təmirsiz vəziyyətdədir. Əlbəttə bir ilə bütün məktəbləri təmir etmək mümkün deyil. Ancaq düşünürəm ki, müddəti qısalda bilərik. 10 ilə deyil, daha qısa müddətə təmir işini yekunlaşdıra bilərik. Bu gün bəzi bölgə məktəblərində vəziyyət çox ağırdır.
3. Bəzi bölgələrdə xüsusilə Bakıda çox ciddi məktəb sıxlığı var. Bu da təhsilin keyfiyyətinə çox ciddi təsir göstərir. Bu məsələnin həlli istiqamətində tədbirlərin sürətləndirilməsinə ciddi ehtiyac var.
4. Ali təhsil müəssisələrində, elmi müəssisələrdə, o cümlədən akademiya sistemində çalışan insanların maaşının artırılması məsələsinə baxılması. Bu gün bir sıra təhsil müəssisələrində maaşlar çox aşağıdır.
Həyata keçirilən islahat nəticəsində orta məktəb müəllimlərinin maaşı artırılıb. Bu gün bir sıra ali təhsil müəssisələrində maaş orta məktəb müəllimindən aşağıdır. Bu ziddiyyət aradan qaldırılmalıdır.
5. Ali təhsil müəssisələrinin maddi-texniki bazasının gücləndirilməsi istiqamətində addımların atılması. Söhbət həm də yeni laboratoriyaların yaradılmasından gedir.
6. Universitetlərin tədqiqat yönümlü fəaliyyətinin dəstəklənməsi üçün əlavə maliyyə vəsaitinin ayrılması məsələsinə baxılması.
Məscidlərin maliyyələşdirilməsi və din xadimlərinin maaşı məsələsinə gəldikdə isə son illər dövlətimiz din sahəsinə qayğısını daha da artırıb. Bu gün hər ay din xadimlərinə maddi dəstək göstərilir. Bu heç şübhəsiz ki, dövlətimizin din sahəsinə, din xadimlərinə qayğısının göstəricisidir. Ancaq burada bir mühüm məsələ var. Həmin şəxs aldığı təxminən 700 manatla həm özü dolanmalı həm də məscidin kommunal, təmizlik və digər xərclərini ödəməlidir. Bu da öz növbəsində məscidlərin fəaliyyətinin düzgün qurulmasına təsirsiz ötüşmür.
Məcburi köçkünlərin işləri üzrə
Bu gün cənab Prezidentin diqqət və qayğısı ilə işğaldan azad olunmuş ərazilərdə çox böyük işlər görülür. Bütün diqqətimizin azad olunmuş ərazilərə yönəlməsi təbii və zəruridir.
Ancaq məcburi köçkün şəhərciklərində hələ də bəzi bağça və səhiyyə məntəqələrinin fəaliyyət göstərməməsi insanlarımız üçün ciddi çətinlik yaradır. Onsuz da dövlət obyektlərin tikintisinə pul ayırıb. İnsanlar bizdən bu obyektlərin nə üçün fəaliyyət göstərmədiyini soruşurlar.
Digər bir məsələ. Son illər cənab Prezidentin rəhbərliyi ilə Azərbaycanın müxtəlif bölgələrində çoxlu şəhərciklər salınıb. Çoxlu sayda insanımız evlə təmin olunub. Bunlar çox böyük işlərdir.
Ancaq bu gün hələ də ağır şəraitdə yaşayan insanlarımız var. Xeyli də ev tikmişik. Təklif edirəm bu evləri müvəqqəti həmin insanlara verək. Onsuz da azad edilmiş ərazilərdə tikilən evlər hazır olduqca həmin insanlar o evləri boşaldacaqlar.
Digər məsələ bu gün məcburi köçkünlərə ayrılan vəsaitlə bağlıdır. Bu gün adına VÖEN və ya ev olan hər bir məcburi köçkün ailəsinin müavinətinin kəsilməsi prosesi davam edir. Bunun 20217-ildə edilmiş dəyişiklərə əsasən edildiyini bilirəm. Ancaq onsuz da bu insanlar bir müddətdən sonra qayıdacaqlar. Hesab edirəm hazırda bu məsələyə bu formada yanaşmağa ehtiyac yoxdur. Onsuz da burda çox yüksək vəsaitdən söhbət getmir.
Mədəniyyət üzrə: Bu gün əksər Azərbaycan televiziyalarının efirini milli-mənəvi dəyərlərimizə ziddi şou verilişləri bəzəyir. Televiziyalar bunu maliyyə gəlirləri ilə əlaqələndirirlər. Ancaq düşünürəm biz daha çox maarifləndirici, qələbəmizin möhkəmləndirilməsinə, milli – mənəvi dəyərlərimizin təbliğinə yönəlmiş verilişlərə üstünlük verməliyik. Bu cür verilişlərin maliyyələşdirilməsi mexanizmləri barədə düşünməliyik".
Mürtəza
Ölkə.Az
