Deputatlar Mərkəzi Bankdan izahat tələb etdi

“Beynəlxalq Valyuta Fondu 2024-cü ildə qlobal və regional inflyasiyanın pik həddə davam edəcəyini proqnozlaşdırır, amma Azərbaycanda inflyasiyanı birrəqəmli elan etmişik. Belə bir vəziyyətdə dünya bankları faiz dərəcələrini sərtləşdirdiyi halda. Azərbaycanda isə faiz dərəcələrinin yumşaldılma yolu seçilib. Belə bir vəziyyətdə Azərbaycan hansı siyasəti yürüdəcək ki, qlobal proseslərlə uyğunlaşsın”.

Ölkə.Az xəbər verir ki, bunu deputat Əli Məsimli büdcə müzakirələri zamanı deyib.

O əlavə edib ki, burada hansısa tələskənlik var və buna aydınlıq gətirilməlidir. 

Milli Məclisin iqtisadi siyasət, sənaye və sahibkarlıq komitəsinin sədri Tahir Mirkişili də bildirib ki, qlobal inflyasiya fonunda Mərkəzi Bankın monetar siyasəti sərt, yoxsa yumşaq olacağına aydınlıq gətirməlidir.   

Komitə sədr eyni zamanda növbəti ildə neft hasilatının azalması ilə bağlı ÜDM-in azalmasına diqqət çəkərək Maliyyə və İqtisadiyyat Nazirliyinə bu məsələyə aydınlıq gətirməsini istəyib: “Necə etmək lazımdır ki, hasilatın və ya qiymətin aşağı düşüb-düşməməsindən asılı olmayaraq ÜDM-ə təsirini aradan qaldırmaq olar”.

Mürtəza
Ölkə.Az