Səfir: Latviya NATO və Aİ-nin Azərbaycanla yaxşı münasibətlərini təşviq edir

Bakıda Latviyanın müstəqilliyinin elan olunmasının 105-ci il dönümü qeyd olunub.

APA xəbər verir ki, mərasimdə Latviyanın Azərbaycandakı səfiri Edqars Skuya çıxış edib.

O, ölkəsinin müstəqillik mübarizəsindən söz açıb. Səfir deyib ki, ölkəsinin uzunmüddətli faciələrlə, işğalla üzləşməsinə baxmayaraq bu gün Latviya müstəqil, suverendir, öz müstəqilliyini qorumaqda qətiyyətlidir: "Latviya beynəlxalq hüququ və prinsipləri, ölkələrin ərazi bütövlüyü və suverenliyini dəstəkləyir".

"Bizim Azərbaycanla dostluq münasibətlərimiz, strateji tərəfdaşlığımız, yüksək səviyyəli əlaqələrimiz var. Biz bu əməkdaşlığı qiymətləndiririk. Bizim iqtisadi əlaqələrimiz genişlənir. Azərbaycan Cənubi Qafqazda Latviyanın vacib tərəfdaşıdır. Son iki ildə ölkələrimiz arasında ticarət dövriyyəsi artıb, əməkdaşlığımız şaxələnib. Biz Azərbaycan gəncliyinin Latviyaya marağını görürük. Gələn il iki ölkə arasında diplomatik münasibətlərin 30 illiyini qeyd edəcəyik. Latviya NATO və Aİ üzvü kimi hər iki təşkilatın Azərbaycanla yaxşı münasibətlərini təşviq edir, dəstəkləyir", - səfir vurğulayıb.

"Mən ölkələrimiz arasında əla münasibətlərdən məmnunluğumu ifadə edirəm. İnanıram ki, birgə səylərimiz münasibətlərimizi genişləndirmək istiqamətində davam edəcək", - diplomat qeyd edib.

Daha sonra Azərbaycan xarici işlər nazirinin müavini Samir Şərifov çıxış edərək iki ölkə arasında dostluq münasibətlərinin zəngin tarixi olduğunu deyib: "İki ölkə daima bir-birinin suverenliyini, ərazi bütövlüyünü dəstəkləyib. Ölkələrimiz arasında əlaqələr qarşılıqlı etimada və hörmətə əsaslanır".

Nazir müavini Azərbaycan Prezidentinin 2017-ci ildə Latviyaya səfərini xatırladıb, o deyib ki, bu səfər çərçivəsində iki ölkə arasında strateji tərəfdaşlıq haqqında sənəd imzalanıb.
Nazir müavini Samir Şərifov iki ölkə arasında qarşılıqlı yüksək səviyyəli səfərlərin, görüşlərin keçirildiyini, bunun münasibətlərə töhfə verdiyini qeyd edib.

Tədbirdə səfirliyin 2023-cü ildəki fəaliyyətinə dair kadrlar tədbir iştirakçılarına nümayiş olunub.