İraq Baş nazirinin müşaviri Azərbaycana təşəkkür edib

"Ailə, Qadın və Uşaq Problemləri üzrə Dövlət Komitəsinin sədri Bahar Muradovaya və xüsusilə Azərbaycanın İraqdakı səfiri Nəsir Məmmədova bu dəvətə görə təşəkkür edirəm".

Report" xəbər verir ki, bunu İraq Baş nazirinin qadın məsələləri üzrə müşaviri Ala Tahsin Habib Talabani noyabrın 20-də Qoşulmama Hərəkatının ailə, qadın komitələrinin Bakıda keçirilən “Qadınların hüquqlarının inkişaf etdirilməsi və səlahiyyətlərinin artırılması” mövzusunda konfransda çıxışı zamanı deyib.

Onun sözlərinə görə, İraq qadınları iqtisadi və ictimai məsələlərdə önəmli rol oynayır: "Ölkə parlamentinin 1/3-ni qadınlar təşkil edir. Bizim üçün qadınların hüquqları və qadınların səlahiyyətləndirilməsi önəmli məsələlərdir. Qadınlara qarşı zorakılığın aradan qaldırılması prioritetdir. Bu məsələ ilə bağlı 75-dən çox dövlət sənədi qəbul edilib. 2021-ci ildən etibarən hökumət qadınların səlahiyyətləndirilməsinə daha çox diqqət ayırıb. Biz İŞİD müharibəsi dövründə qadınlara qarşı zorakılığın ən dəhşətlisini görmüşük. İraqda Miqrasiya İdarəsi, Rabitə və Texnologiya Nazirliyi qadın idarəçilərə həvalə olunub. Ümumiyyətlə, əksər nazirliklərdə, İraqda mövcud olan bütün dövlət strukturlarında qadınların iştirakı təmin olunur. Qadınların dəstəklənməsi ilə bağlı yaxın gələcəkdə tədbir keçiriləcək. İraqda Müdafiə və Daxili İşlər nazirliklərində də işçilərin 10 faizini qadınlar təşkil edir".