ABŞ-nin Azərbaycana qərəzinin səbəbi: Ermənistan planı puç oldu
“ABŞ Senatının ermənilərə bu dəstəyinin mahiyyəti və fəlsəfəsi hər kəsə məlumdur. Hazırda Qafqaz bölgəsində möhkəmlənmək uğrunda bir oyun gedir. Amma oyunun da müəyyən qaydaları olur. Başqalarının çiyninə qalxmaqla uca görünmək mümkün deyil”.
Bunu Ölkə.Az-a açıqlamasında Milli Məclis sədrinin müavini Fəzail İbrahimli ABŞ Senatının erməniləri müdafiə aktını şərh edərkən deyib.
Vitse-spiker deyib ki, keçən 30 il ərzində dünya dövlətlərinin əsl siması beynəlxalq aləmə bəllidir: “Azərbaycana isə daha yaxından bəllidir. Çünki ötən bu müddət ərzində daha çox haqqı pozulan Azərbaycan olub. 20 faiz torpaqları işğal olunub, bir milyondan çox məcburi köçkün və qaçıqını olub, Xocalı kimi soyqırımı hadisəsi törədilib, lakin beynəlxalq aləm bu haqsızlığa biganə qalıb, səsini çıxarmayıb. Bütün bunların hamısı Azərbaycandakı xarici ölkə diplomatlarının gözü qarşısında baş verib.
ABŞ səfirliyinin Bakıdakı diplomatları bura gəlib özləri üçün quzu kababı yeyib dövlətlərini təmsil etmirlər. Onların hamısı buradakı prosesi izləyib, nə baş verdiyini yaxşı anlayırlar. Baş verənlərlə bağlı ölkələrinə məlumat verirlər. Necə onların gözü kor, qulağı kar oldu ki, Xocalıdakı soyqırımı görmədilər? Belə bir dəhşətli soyqırımına reaksiya da olmadı”.
Deputat hesab edir ki, burada təzadlı cəhətlər mövcuddur: “Təzadlı məqamın biri ondan ibarətdir ki, 1990-cı illərin əvvəllərində BMT TŞ Azərbaycanın xeyrinə olan məlum 4 qətnamə qəbul edir. ABŞ BMT-nin qəbul etdiyi qətnamənin icrasını yerinə yetirmək, Ermənistanın işğalçılıq siyasətinə son vermək, milyondan çox məcburi köçkün və qaçqının öz doğma yurdlarına dönməsinin təmin edilməsi istiqamətində addımlar atmaq əvəzinə, Azərbaycana qarşı “907-ci düzəliş” aktını qəbul edirlər. Bu tarixdə analoqu olmayan hadisədir ki, haqqı pozulan tərəfə sanksiya tətbiq edəsən. Bununla da ABŞ öz iç üzünü göstərdi. Dünya demokratiyası sükanı arxasında əyləşən ABŞ-nin iç üzü Azərbaycana o zamandan bəlli idi. ABŞ Azərbaycana qarşı haqsızlıqlara 30 ilə yaxın müddətdə susdu və səsini çıxarmadı. Bu müddət ərzində Azərbaycanda kiçikdən böyüyə, hamı bu ölkənin nə qədər ədalətsiz olduğunu gördü.
İkinci təzad isə Azərbaycanın sonuncu antiterror tədbrilərindən sonra baş verdi. Bir yandan ABŞ Azərbaycan tərəfindən həyata keçirilən antiterror tədbirləri nəticəsində ermənilərin etnik təmizləməyə və zorakılığa qalmadığını bəyan etdi, digər tərəfdən isə “907-ci düzəliş” aktını yenidən gündəmə gətirib tətbiq etdilər. Bu, ümumiyyətlə, heç cür anlaşılan hal deyil.
Yenidən tətbiq edilən “907-ci düzəliş” Azərbaycana heç bir təsiri olmasa da, bunun absurd olduğunu deməmək də mümkün deyil. Bunun beynəlxalq hüquqa hayqırı olduğunu necə qeyd etməyəsən?!
Əslində, başda ABŞ olmaqla dünya ölkələri Azərbaycana öz gücünə dünyanın ən mötəbər təşkilatı olan, ancaq indi “portfelsiz nazirə” çevrilən BMT Təhlükəsizlik Şurasının dörd qətnaməsini yerinə yetirdiyi üçün “sağ ol” deməli, təşəkkür etməli idilər. Amma bunun tamamilə əksi olaraq yenidən haqsızlıqla üzləşdi.
Ermənistan da Azərbaycana minnətdar olmalıdır ki, bu gün onu Zəngəzur dəhlizi vasitəsi ilə regiondakı kommunikasiyalara şərik etmək istəyir.
Bütün bunlar Qafqaz uğrunda gedən savaşın tərkib hissəsidir, amma oyun qaydalarına uyğun olmayan şəkildə və ədalətsizcəsinə olan oyun qaydalarıdır. Belə bir oyun qaydası ilə oynamaq heç kimə fayda verə bilməz”.
Vitse-spiker əlavə edib ki, hazırda Qərb ermənilərin əli ilə onları Cənubi Qafqaz bölgəsinə yerləşdirib onlara dövlət quran Rusiyanı bölgədən sıxışdırıb çıxarmaq istəyir: “Qərb Ukraynadakı müharibədən istifadə edib buna nail olmaq istəyir. Qərbin düşüncəsinə görə, Rusiya iki cəbhədə vuruşa bilməz və Cənubi Qafqazı ələ keçirməyin zamanıdır. Bu məqsədlə də Ermənistandan istifadə etməyə çalışır.
Amma mənim bu dediklərim heç də Rusiyanı müdafiə etmək və ya onların bölgədən çıxmasına qarşı olmaq kimi başa düşülməməlidir. Sadəcə olaraq mövcud vəziyyətin fəlsəfəsini izah etmək üçün bunları deyirəm. Burada qətiyyən rus təəssübkeşliyi ola bilməz.
Təbii ki, ruslar da Cənubi Qafqazdan getməlidir”.
Millət vəkili hesab edir ki, Paşinyan Qərbin Rusiyanı bölgədən çıxarmaq üçün hakimiyyətə gətirdiyi adamdır və o da həmin planı icra etməklə məşğuldur: “Paşinyanın hakimiyyətə gəlişi heç də demokratiyanın qələbəsi deyil. Bu əvvəlcədən Qərb tərəfindən hazırlanıb həyata keçirilən bir plandır. Çünki Qarabağ kartından istifadə edib Ermənistanda hakimiyyətə gələn Köçəryan və Sarqsyan xalqa elə zülmlər etmişdi ki, ermənilər küçədən keçənin birinin hakimiyyətə gəlişini qəbul etdi. Odur ki, burada demokratiyadan söhbət belə gedə bilməz. Mən artıq Avropa dəyərləri və ya demokratiyasına inanmıram, həmin ifadələri dırnaqda yazıram. Avropa demokratiyası anlayışı yanlışdır. Avropa sadəcə demokratiya bayrağından istifadə etməklə öz niyyətlərini həyata keçirməyə çalışır.
Hələ 110 il əvvəl, 1913-cü ildə Azərbaycanın, Türk dünyasının böyük oğlu və mütəfəkkiri Əhməd bəy Ağaoğlu Balkan müharibəsi haqqında yazdığı bir məqalədə deyirdi ki, ümid bəslədiyimiz, uğrunda mübarizə apardığımız Avropa demokratiyası gözümüzün qarşısında rəngini dəyişdi. Məlum oldu ki, Avropa demokratiyası Avropa fabriklərinin İran bazarlarını dolduran üstü bəzək, içi çürük şeylərdən başqa bir şey deyilmiş. O böyük mütəfəkkirin yüz on il əvvəl səsləndirdiyi bu fikir günümüzdə də aktualdır və onunla həmahəng səslənir.
Bəli, bu gün demokratiya Qərbin əlində bir ideoloji bayrağa çevrilib və bununla dünyada onlar mürtəce niyyətlərini həyata keçirirlər. Başda ABŞ olmaqla Qərb indi də bu ideoloji bayraq adı altında öz mürtəce niyyətini Ermənistan vasitəsi ilə Cənubi Qafqazda reallaşdırmaq istəyir. Paşinyan da onu hakimiyyətə gətirən həmin qərbli ağalarının şərtlərini yerinə yetirməkdədir. ABŞ Senatının qəbul etdiyi həmin sənəd də iyrənc niyyətin tərkib hissəsidir.
Bircə onu bilirəm ki, ABŞ hara ayaq basıbsa, ora xaraba qalır, od tutub yanır. Bu ölkənin ayaq basdığı ölkələrdə xalqlar xoşbəxtliyə deyil, bədbəxtliyə düçar olur. Əfqanıstan, İraq, Ukrayna, Gürcüstan bunun bariz nümunəsidir. Mixail Saakaşvili indi həbsxanalarda çürüməkdədir. Ermənistan bu acı təcrübələrdən nəticə çıxarmaq əvəzinə, bu oyunun qurbanı olmaq yolunu seçib”.
Qərbin Azərbaycana qarşı bu qədər qərəzli olmasının səbəbini açıqlayan vitse-spiker bildirib ki, Avropa və ABŞ-nin sancısının əsas səbəbi onların regiondakı Ermənistan planının boşa çıxmasıdır: “Azərbaycan Xankəndidə qələbə və zəfər bayrağını ucaltmaqla onların bölgədə həyata keçirmək istədikləri bütün planlarını, o cümlədən “Böyük Ermənistan” ideologiyasını alt-üst etdi, iflasa uğratdı. Regionun gələcək yeni inkişaf yol xəritəsini cızan artıq Azərbaycandır. Onlar da bununla barışa bilmirlər. Ermənilər qarşısında götürdükləri öhdəlikləri yerinə yetirə bilmədikləri üçün çox pərt olublar.
Bu gün regionun gələcək inkişaf yol xəritəsi cənab İlham Əliyev və Rəcəb Tayyib Ərdoğan kimi böyük liderləri tərəfindən müəyyən edilir”.
Vitse-spiker onu da əlavə edib ki, Ermənistanın yürütdüyü siyasət İran və Rusiyanı da çox pərt vəziyyətə salıb:
“Qərbin Ermənistanda möhkəmlənmə cəhdi İranı pərt edib. 30 il Ermənistana xidmət edən İran indi gülünc günə düşüb. Bir xristian ölkəsinə 30 il yardım elə, bu da nəticəsi... Rusiya nəinki pərt olub, hətta çox pis formada əsəbiləşib. Bu “saxla yetimi ki sonda üzünə ağ olsun” misalına bənzəyir.
Amma bütün bu haqsızlıqlara, mürəkkəb situasiyalara baxmayaraq Azərbaycan cənab Prezidentin yürütdüyü siyasət nəticəsində zəfər çaldı. Xankəndidə Zəfər bayrağını qaldırmaqla dünya güclərinin “Böyük Ermənistan” ideologiyasını məhv edib həmin idelogiyanın tabutuna son mismarı vurdu. İndi Fransa, ABŞ həmin mismarı dartıb çıxarmağa çalışsa da, nəticəsi yoxdur. Cənab Prezidentin liderliyi altında Azərbaycan bu proseslərdən də qalib və üzüağ çıxacaq. Azərbaycan bölgənin cızdığı yol xəritəsinə uyğun olaraq irəliyə doğru irəliləyəcək və qarşısındakı hədəflərə nail olacaq”.
Mürtəza
Ölkə.Az
