Bizi əsas narahat edən məsələ ana və uşaq ölümüdür - Komitə sədri
Bu gün Azərbaycanda bizi əsas narahat edən məsələ ana və uşaq ölümüdür.
Ölkə.az xəbər verir ki, bunu Mili Məclisin Səhiyyə komitəsinin sədri Əhliman Əmiraslanov parlamentdə keçirilən “Ailə sağlamlığı və dəyərləri qanunvericilik aspektində” mövzusunda ictimai dinləmələr zamanı deyib.
“Bu sahədə uğurlar olsa da, hələ də problemlər mövcuddur. Əgər 90-cı illərin əvvəlində hər min doğuşa 30 ölüm faktı qeydə alınırdısa, indi bu rəqəm 10-11 nəfər civarındadır. Bu uğur olsa da, bununla kifayətlənmək olmaz. Biz bu rəqəmlə dünyanın inkişaf etmiş ölkələrindən geri qalırıq. Çalışmalıyıq ki, ana və uşaq ölümü daha aşağı olsun”, - komitə sədri deyib.
O əlavə edib ki, burada problem səhiyyə işçilərindən asılı olsa da, günahın bir qismi insanların özündədir. “Onlar vaxtında səhiyyəyə müraciət etməlidir. Bu gün az olsa da, xəstəxanadan kənar doğuşlar, hamiləlik dövründə vaxtlı-vaxtında müayinələrdən keçməmə, nikahdankənar doğuşların olması ana və uşaq ölümünə səbəb olan amillərdəndir. Bu problem aradan qaldırılmalıdır”, - Əmiraslanov deyib.
Mürtəza
Ölkə.Az
