Qarabağı tərk edən separatçılar indi də İrəvanda bir-birini qırır

Separatçılar Qarabağdakı əməliyyatlar zamanı baş verən bəzi məqamlarla bağlı “açırlar sandığı, tökürlər pambığı”.

Qarabağı tərk edib İrəvanda məskunlaşan separatçı-terrorçular arasında, xüsusən də Samvel Babayanın İrəvanda 44 günlük müharibə ilə bağlı xüsusi İstintaq komissiyasında ifadəsindən sonra savaş getdikcə daha şiddətli xarakter almaqdadır. Samvel Babayanın Samvel Şahramanyandan sonra vaxtı ilə separatçı rejimin “baş prokuroru” olan Qurgen Nersisyanı yalançı və dələduz adlandırıb. Babayan 44 günlük müharibə ilə bağlı “Artsax prokurorluğunda” dindirilməsi ilə bağlı deyilənləri rədd edərək deyib: “Kim deyir ki, məni dindirdilər, yalançıdır və özünü axmaq yerinə qoyub”.

Babayanın dediklərinə sərt reaksiya verən separatçı rejimin “baş prokuroru” vəzifəsində çalışmış Qurgen Nersisyan mətbuata açıqlamasında deyib ki, yalançının özü Babayandır: “Əgər o düşünürsə ki, Qarabağ təslim edilib və bütün sənədlərin yandırılaraq izlər itirildiyini düşünürsə, dəhşətli dərəcədə yanılır. Babayan 44 günlük müharibə və 10 noyabrda imzalanmış üçtərəfli bəyannamə ilə bağlı başlanmış cinayət işi çərçivəsində “Artsax Təhlükəsizlik Şurasının katibi” kimi dindirilib”. 

Nersisyan əlavə edib ki, Babayan 44 günlük müharibə zamanı Qarabağda cənub qanadında gedən əməliyyatlar barədə açıqlamalar verərək özünü tərifləyib: “Əməliyyat uğursuzluqla nəticələnəndə hər şey məhv oldu. Ona görə də əməliyyata rəhbərlik edən məsul şəxs kimi Babayanı dindirməyə çağırdıq. Müharibə bitəndən sonra ağlına nə gəldi danışdı. Samvel Babayan da orada-burada deyirdi ki, guya onun cənub cinahının əməliyyatının uğurla həyata keçirilməsində rolu var. Amma dindirmə zamanı bunları inkar edərək dedi: “Mənim deyəcəyim söz yoxdur. Mənim hansı funksiyam var idi ki? Nəsə deməlidirsə, qoy ordu desin. Bir sözlə, o, hər şeyi başqalarının üzərinə atdı”, – Qurgen Nersisyan bildirib.

Nersisyan onu da əlavə edib ki, Babayanın məsul olduğu bölgədə Azərbaycan qoşunları cəbhəni yararaq Hadrutu və sonda da Şuşanı ələ keçirdi.

Nersisyan bildirib ki, 2020-ci ilin oktyabrın 6-da Xankəndidə olub  və o Arayik Harutyunyan, Samvel Babayan, Cəlal Arutyunyan, Milli Təhlükəsizlik Xidmətinin direktoru və digər rəsmi şəxslərlə görüşüb.  Babayan o zaman “Təhükəsizlik Şurasının katibi” kimi Paşinyana və Harutyunyana deyə bilərdi ki, cənub qanadının əməliyyatı fəlakətlə nəticələnə bilər, səhvdir, bunu etməyin. O, fikrini müharibədən sonra yox, onda deməli idi”. 

Qeyd edək ki, Babayan bundan öncə separatçı rejimin sonuncu “rəhbəri” Samvel Şahramanyanı, ondan əvvəlkiləri, “deputatları” hədəf almışdı.

Mürtəza
Ölkə.Az