Hökuməti istefaya göndərəcəyik, bu siyasət dəyişdirilməlidir - fransız jurnalist

Fransada bu gün anti-Azərbaycan və anti-Türkiyə əhvali-ruhiyyəsi var. Bu, daxili siyasi vəziyyət və erməni lobbisinin fəaliyyəti ilə bağlıdır.

Ölkə.Az xəbər verir ki, bunu fransız jurnalist, “Şuşa – Qafqazın mirvarisi” kitabının müəllifi Jan-Mişel Brun Beynəlxalq Münasibətlər və Diplomatiya Araşdırmalar Mərkəzinin “Turan” beynəlxalq konfransında onlayn çıxışı zamanı deyib.

"Mən indiki Fransa hökumətinin təkcə Azərbaycana deyil, bütün İslam dünyasına qarşı yönəlmiş siyasətinə qarşıyam. Bu siyasət dəyişdirilməlidir və dəyişdiriləcək, çünki qəbuledilməzdir. Növbəti seçkilərdə indiki hökuməti istefaya göndərəcəyik", - o deyib.

Qeyd edib ki, Azərbaycan bütün dünya dövlətləri ilə, o cümlədən Qarabağı Azərbaycanın ərazisi kimi tanıyan Fransa və Ermənistanla yaxşı münasibətlər qurmağa çalışır: "Ümid edirəm ki, Azərbaycan-Fransa münasibətləri gələcəkdə daha da yaxşılaşacaq".