Mətn ölçüsü:
  • 100%

Ombudsman Aparatının rəsmisi: \"Metsamor AES-in fəaliyyəti region üçün ciddi təhlükədir\"

Azərbaycan Respublikasının İnsan Hüquqları üzrə Müvəkkili (Ombudsman) Aparatı rəhbərinin müavini Rəşid Rumzadə Metsamor Atom Elektrik Stansiyasının fəaliyyətinin region üçün ciddi təhlükə olduğunu bildirib.

"Report" xəbər verir ki, o, dekabrın 6-da Bakıda keçirilən Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə “Dayanıqlı inkişaf məqsədlərinə nail olmaq üçün sağlam ətraf mühit və minasız həyat” adlı Beynəlxalq Bakı Forumunda çıxışı zamanı bu gün 70-dən çox ölkənin mina terrorundan əziyyət çəkdiyini deyib.

R.Rumzadə vurğulayıb ki, Azərbaycan da mina problemindən əziyyət çəkən ölkələrdəndir: "Ermənistan uzun illər Azərbaycana qarşı müxtəlif cinayətlər törədib. Onlardan biri də məhz mina terrorudur. Otuz il ərzində təbii sərvətlərimiz talan edilib. Bu, ekosit cinayətdir. Oxçuçayın uzun illər çirkləndirilməsi da region üçün ciddi təhlükədir. Ermənistanda köhnəlmiş Metsamor Atom Elektrik Stansiyasının fəaliyyəti region üçün ciddi təhlükədir".

O, Ermənistan ekoloji təhlükə ilə bağlı bir çox beynəlxalq sənədləri ratifikasiya etməsinə baxmayaraq, onları yerinə yetirmədiyini söyləyib.