Musa Qasımlı: Müsavat divanından Milli Məclisə

Ölkə.az Parlament seçkiləri öncəsi IV çağırış Azərbaycan Milli Məclisinin deputatları ilə ictimaiyyəti tanış etməkdə davam edir.

Bu gün oxucularımıza təqdim edəcəyimiz deputat Sumqayıt ikinci seçki dairəsindən Milli Məclisə üzv seçilmiş tarixçi Musa Qasımlıdır. Musa Qasımlı Parlamentin böyük əksəriyyətinin üzvləri kimi yolu YAP-dan keçmiş deputat deyil. Musa Qasımlı deputatlığa müxalifət partiyalarından birinin rəhbərliyindən keçərək gəlib. Gəlin deputatın tərcümeyi-halı ilə tanış olaq:

Qasımlı Musa Cəfər oğlu — tanınmış Azərbaycan tarixçisi, tarix elmləri doktoru, professor. Azərbaycan Respublikasının Milli Məclisi nin IV çağırış deputatı. Azərbaycan Milli Elmlər Akademiyası Dünya Siyasəti İnstitutunun direktoru (04. 11. 2014-cü ildən).

Qısa arayış:

Musa Qasımlı, 1957-ci il oktyabrın 28-də Yardımlı rayonunun Hamarkənd kəndində anadan olub. 1974-cü ildə orta məktəbi tərifnamə ilə bitirib. Həmin il isə Azərbaycan Dövlət Universiteti nin tarix fakültəsinə daxil olmuş, 1979-cu ildə oranı fərqlənmə diplomu ilə bitirmişdir. 1982-1985-ci illərdə Bakı Dövlət Universitetinin Avropa və Amerika ölkələrinin yeni və müasir tarixi kafedrasının aspiranturasında oxuyub. 1986-cı ildə namizədlik, 35 yaşında isə doktorluq dissertasiyası müdafiə edərək ölkədə ən gənc tarix elmləri doktoru olub. Beynəlxalq münasibətlər tarixi üzrə ixtisaslaşıb. 1986-1992-ci illərdə BDU-nun Avropa və Amerika ölkələrinin yeni və müasir tarixi kafedrasında müəllim, baş müəllim,dosent, tarix fakültəsinin dekan müavini vəzifələrində çalışıb. BDU-nun Avropa və Amerika ölkələrinin yeni və müasir tarixi kafedrasının professorudur.

1992-1997-ci illərdə Azərbaycan Respublikası Milli Məclisi nin beynəlxalq əlaqələr şöbəsində işləyib. Daha sonra Müsavat partiyasına qatılan professor bu siyasi təşkilatın Divan üzvü olub. 2003-cü il prezident seçkilərindən sonra Müsavatdan açıq bəyanat verərək çıxan Musa Qasımlı fəaliyyətini Elmlər akademiyasında davam etdirib və bir müddət siyasətdən uzaqlaşıb.

2010-cu il noyabrın 7-də keçirilən parlament seçkilərində isə 42 saylı Sumqayıt ikinci seçki dairəsindən Azərbaycan Respublikası Milli Məclisinin deputatı seçilib. Milli Məclisin Elm və Təhsil Komitəsinin üzvüdür. Türkiyə, Kanada, Braziliya, Peru, Danimarka, Malta, Estoniya, Bosniya və Herseqovina parlamentləri ilə dostluq qrupunun üzvüdür. Azərbaycan Mətbuat Şurası İdarə Heyətinin üzvüdür.

2003-cü il prezident seçkilərindən sonra paytaxtda baş vermiş iğtişaşlardan sonra birbaşa efirdə mənsub olduğu partiyanın üzvlüyündən istefa verən Musa Qasımlı 2015-ci il seçkilərində isə namizədliyini Sumqayıtdan yox, doğma rayonu olan Yardımlıdan irəli sürüb.

Qeyd edək ki, o, namizədliyini 72 saylı Yardımlı-Masallı Seçki Dairəsindən verib və rəqibi də deputat həmkarı və həmyerlisi, xalq şairi Sabir Rüstəmxanlıdır.

Ölkə.az