Cəmiyyət onların niyyətini bilir, tükəniblər, buyursunlar meydana - Deputat
“Azərbaycan Ermənistanın işğalına son verib qələbə çalıb ərazi bütövlüyünü və suverenliyini bərpa etməklə Cənubi Qafqaz bölgəsində yeni reallıq yaradıb. Bu reallıq da öz növbəsində Azərbaycanın qarşısında yeni öhdəliklər qoyur. Çünki qələbədən sonra bölgədə dayanıqlı sülhün, sabitliyin, sıx əməkdaşlıq formatlarının yaranmasına, təhlükəsizliyin daha etibarlı şəkildə təminatının davamlı inkişafı yeni hədəflər və çağırışlara dayanır. Azərbaycan da bu reallıqlara uyğun olarq öz siyasətini yürüdür. Bu gün Azərbaycanın bölgənin aparıcı ölkəsi kimi Cənubi Qafqazda dayanıqlı sülhün, sıx inteqrasiya olunmuş əməkdaşlıq formatının yaranması istiqamətində, o cümlədən yeni çağırışlara və hədəflərə uyğun olaraq ciddi addımlar atmaqdadır. Lakin təəssüflə qeyd etmək lazımdır ki, Azərbaycanın yaratdığı yeni reallıq bəzi ölkələr tərəfindən həzm edilmir. Onlar hər vasitə ilə ölkəmizə qarşı təxribatlar törədirlər. Bu məqsədlə də bölgədə sülhün, əməkdaşlığın yaranmasına deyil, əksinə gərginlik yaradıb, maraqlarını təmin etməyə çalışırlar. Bu və digər amillər Azərbaycanda növbədənkənar prezident seçkilərinin keçirilməsini labüd edir”.
Bunu Ölkə.Az-a açıqlamasında deputat Mahir Abbaszadə deyib.
O əlavə edib ki, seçkini zəruri edən digər amil isə Azərbaycanın ərazi bütövlüyünü və suverenliyini bərpa etməsidir: “7 fevralda keçiriləcək seçki Azərbaycanın müstəqillik tarixində ilk seçki olacaq ki, bütün ölkə ərazisində, Xankəndidə, Xocalıda, Xocavənddə, Ağdərə də keçiriləcək.
Yeni reallıq ölkədə siyasi sistemin güclənməsini tələb edir ki, bunun da yolu ancaq seçkidən keçir. Növbədənkənar prezident seçkiləri Azərbaycnda siyasi islahatların daha da dərinləşməsinə, sistemin güclənməsinə və möhkəmlənməsinə xidmət edir. Növbədənkənar seçkilər Azərbaycan cəmiyyətinin İkinci Qarabağ savaşında olduğu kimi, bir daha necə güclü və monolit güc olduğunu dünyaya nümayiş etdirəcək. Azərbaycan seçicisi öz mövqeyi ilə həm Azərbaycanın qələbəsini həzm edə bilməyən xarici güclərə, həm onların daxildəki uzantılarına, həm də radikal müxalif qüvvələrə göstərmiş olacaq”.
Azərbaycanda seçkilərin demokratik, şəffaf və ədalətli keçdiyini qeyd edən deputat bildirib ki, istənilən şəxs və ya siyasi partiyanın təmsilçisi seçki qanunvericiliyinin tələblərinə uyğun şəkildə iştirak edə bilər və seçkidə iştirak edənlərə hər cür bərabər şərait yaradılacaq: “Azərbaycanda seçkidə iştirak edən istənilən şəxs və ya siyasi qüvvə üçün vahid imkanlar yaradılıb və onlar bundan faydalana bilərlər. Seçki ümumiyyətlə siyasi qüvvə üçün özünü cəmiyyətə təqdim etmək üçün bir fürsətdir. Odur ki istənilən siyasi qüvvə seçki marafonunda iştirak edə bilər.
Amma yenə də təəssüflər olsun ki, biz özlərini radikal müxalifət adlandıran qüvvələr növbədənkənar seçkilər elan olunandan sonra öz əvvəlki ənənələrinə sadiq qalaraq qarayaxma, qərəz dolu mövqe sərgiləyərək seçki prosesindən öz məqsədləri üçün manipulyasiya etməyə cəhd edirlər. Lakin Azərbaycan cəmiyyəti bunların niyyətini yaxşı anlayır. Cəmiyyət yaxşı bilir ki, onlar tükəniblər və siyasi səhnədən getməlidirlər. Bununla belə, öz xaricdəki ağalarının sifarişini yerinə yetirib Azərbaycanın imicinə xələl gətirməyə cəhd edirlər. Onların bu cəhdi hər zaman olduğu kimi, növbəti dəfə də iflasa uğrayacaq. Əgər onların dediyi kimi, cəmiyyətə nüfuzları varsa, buyursunlar. Bu da meydan. Manipulyasiyaya son verib boşboğazlığa, demaqogiyanı buraxıb öz məhrətlərini, güclərini nümayiş etdirsinlər. Görək nəyə qadirdilər?!... Azərbaycan xalqı qarşısındakı xidmətlərini ortaya qoysunlar, təbii ki, əgər belə bir xidmtələri varsa.... Dedikləri kimi, gücləri varsa...
Bu gün nəinki Azərbaycanda, dünyanın çoxsaylı ölkələrində birmənalı şəkildə cənab Prezident İham Əliyevə alternativ lider yoxdur. Avropa ölkələri belə cənab İlham Əliyevi dünya səviyyəli lider kimi qəbul edirlər.
Bu gün cənab Prezident 20 illik fəaliyyəti dövründə qarşıya qoyulan bütün hədəflərə nail olub. Bundan sonra da Azərbaycan xalqı onun liderliyi altında hələ çoxlu uğurlara imza atacaq. Bunu Azərbaycan seçicisi yaxşı bildiyindən öz gələcəyini ona etibar edir”.
Mürtəza
Ölkə.Az
