Vasitəçisiz hərbçilərin dəyişdirilməsi bəzi güclərə mesaj idi - AÇIQLAMA
Heç bir vasitəçinin iştirakı olmadan Azərbaycan-Ermənistan hərbçilərinin qarşılıqlı şəkildə dəyişdirilməsi, iki ölkə arasında etimad mühitinin formalaşması, istənilən problemlərin və məsələlərin birbaşa danışıqlar yolu ilə həlli baxımdan mühüm əhəmiyyət kəsb edir.
Bunu Ölkə.Az-a açıqlamasında deputat Məşhur Məmmədov deyib.
Onun sözlərinə görə, hərbçilərin dəyişdirilməsi dekabrın 7-də Bakı və İrəvan arasında ikitərəfli danışıqlar nəticəsində imzalanan birgə bəyanatın nəticəsidir.
“Bu eyni zamanda Azərbaycanın siyasi rəhbərliyinin, xüsusilə Ali Baş Komandanın gücünün, humanizm prinsiplərinə verdiyi dəyərin göstəricisidir. Müzəffər Ali Baş Komandan bu addımı ilə sübut etdi ki, hər bir Azərbaycan vətəndaşının təhlükəsizliyinin qarantıdır”, - deputat qeyd edib.
O əlavə edib ki, burada digər mühüm məqam isə hər hansı üçüncü tərəfin iştirakı olmadan Azərbaycan və Ermənistanın öz aralarında vacib məsələlərlə bağlı razılıq əldə etmək üçün siyasi iradəyə malik olmalarıdır: “Hərbçilərin dəyişdirilməsi həm də Azərbaycan-Ermənistan münasibətlərindən istifadə edərək bölgədə öz maraqlarını təmin etmək istəyən qüvvələrə bir mesajdır. Mesaj ondan ibarətdir ki, Azərbaycan və Ermənistan kənar qüvvələrin iştirakı olmadan da razılığa gələ bilirlər.
Cənab Prezident İlham Əliyev bununla bağlı dəfələrlə bəyanatla çıxış edib. Bildirib ki, hər hansı vasitəçi olmadan birbaşa ikitərəfli danışıqlar yolu ilə istənilən məsələni daha asan formada müzakirə edib qarşılıqlı şəkildə razılıq əldə etmək mümkündür. Üçüncü tərəfin iştirakı daha çox məsələnin uzanmasına xidmət edir. Çünki digər tərəflər belə vasitələrdən istifadə etməklə bölgədə öz maraqlarını təmin etməyə çalışır ki, bu da bölgədə dayanıqlı sülhə, davamlı inkişafa və sabitliyə deyil, gərginliyin davam etməsinə xidmət edir. O baxımdan ikitərəfli formatda görüşlər bütün parametrlərə görə daha effektivdir. Nə zaman ki ikitərəfli formatda görüşlər keçirilirsə, onun effekti üç və ya daha çox formatda keçirilən görüşlərdən nəticəli olur. Necə ki biz bunu sitər sərhədlərin delimitasiya və demarkasiyası üzrə komissiyaların şərti sərhəddə görüşündə, həm də sonuncu hərbçilərin dəyişdirilməsi prosesində şahidi olduq. Hesab edirəm ki, İrəvan özündə iradə tapıb üç və daha çox formatlı görüşlərə üstünlük verməkdənsə, ikitərəfli formatda görüşlərə üstünlük versə, daha yaxşı olar. İkitərəfli görüşlər həm xalqlar arasında daha tez bir zamanda etimad mühitinin yaranmasına, həm də sülh sazişinin imzalanmasına öz töhfəsini verər. İkitərəfli formatda keçirilən görüşlər bir ənənə halını alarsa, o zaman növbəti mərhələdə cənab Prezidentin bəyan etdiyi kimi, qarşılıqlı etimad mühitinin formalaşdırılması məqsədilə vətəndaş cəmiyyətinin daha geniş üzvlərinin iştirakı ilə görüşlər keçirilə və ya qarşılıqlı səfərlər təşkil edilə bilər. Bu həm bölgədə dayanıqlı sülhün, sabitliyin, sıx inteqrasiya olunmuş əməkdaşlığın, həm də xalqlarımız arasında düməçiliyin aradan qalxıb normal qonşuluq münasibətlərinin qurulmasına öz töhfəsini verər. Odur ki Azərbaycanın iki ölkə arasında sülhün əldə edilməsi və etimad mühitinin yaranması üçün bundan başqa daha yaxşı nəticəyə xidmət edən effektiv variantı ola bilməz”.
Mürtəza
Ölkə.Az
