Elza: “Seçicilərimin 10 050 deyil, “on əllə” mənə səs verəcəyini demişəm”
Deputatlığa namizədliyi irəli sürülən əməkdar artist Elza Seydcahan “durduğu yerdə işə düşüb” desək yanılmarıq. Belə ki, mətbuatda yayılan məlumata görə, bəstəkar-müğənni mətbuata açıqlama verərək, bildirib ki, iki gün ərzində 10 050 imza toplayıb.
Bunun ardınca isə əməkdar artistin namizədliyini irəli sürdüyü 54 saylı Şabran-Siyəzən Seçki Dairəsi tərəfindən yayılan xəbərin yalan olduğu barədə açıqlama verilib.
Qeyd edilən seçki dairəsinin sədri Saleh Təhməzov mətbuata məlumat verərək bildirib ki, Elza Seyidcahan 10 050 deyil, yalnızca tələb olunan 550 imzanı toplayıb: “Sənədləri yoxlanılıb və Dairə Seçki Komissiyası aidiyyəti üzrə Elza xanıma 11 imza vərəqi təqdim edib. Elza xanım həmin imza vərəqələrini bizdən götürüb və 550 imza ilə birlikdə Dairə Seçki Komissiyasına qaytarıb. Hazırda bəstəkarın imzaları Dairə Seçki Komissiyasının işçi qurupu tərəfindən yoxlanır. İşçi qurupu sonda nə qərar verəcək, onu deyə bilmərəm”.
Məsələ ilə əlaqədar əməkdar artist Elza Seyidcahan ilə əlaqə yaratdıq. Bəstəkar-müğənni haqqında yanlış məlumat yayan jurnalisti kəskin tənqid edib: “Axı, imza vərəqələri 550 imza üçün olduğu halda, mən necə 10 050 imza toplaya bilərəm? Hər kəs bilir ki, seçkidə yalnız 550 imza toplana bilər.
Jurnlasit diktafonsuz gəlib, məndən müsahibə alıb, aldığı məlumatı da istədiyi kimi yazıb. Hələ üstəlik, “ekzklüziv xəbər” başlığı qoyub, mətbuata verib. Bütün mətbuat da “copy paste” edib, səhv məlumatı yayıb. Bir kimsə bu məsələnin doğru və ya yanlış olduğunu araşdırmaq üçün mənimlə əlaqə saxlmağa çalışmadı. Bu da qeyri-peşəkarlığın nəticəsidir”.
Elza Seyidcahan başına gələnlər barədə musavat.com-a danışıb: “Dayım oğlunun toyunda idim. Toydan çıxıb, pilləkənləri enəndə mənə bir xanım yaxınlaşdı. Əvvəl elə bildim ki, mənimlə şəkil çəkdirmək istəyir. Dedi ki, “mən sizin fanatınızam, müsahibə istəyirəm”. Sonra isə soruşdu ki, “imza toplaya bilmisinizmi?” Dedim ki, “əlbəttə 550 imzanın hamısını toplamışam. Burada təəccüblü heç nə yoxdur. Seçicilərim mənə 10 əllə səs verməyə hazırdırlar. Əgər 550-dən artıq imza vərəqəsi versəydilər, onu da toplayardım. Mən bu hörməti qazanmışam və Azərbaycanın istənilən dairəsindən imza toplaya bilərəm”.
Jurnalist isə “on əllə” dediyim sözü “ 10 050 imza toplamışam” kimi yazıb. Mətbuatda məlumatı görən kimi həmin jurnalistlə əlaqə saxladım. Xanım jurnalist bildirdi ki, əslində mənim dediklərimi olduğu kimi yazıb, lakin sonradan redaktor sözləri dəyişib. Mən də bildirdim ki, əgər məlumat dəyişdirilməzsə, məhkəməyə müraciət edəcəm.
Axı belə şeylər nəyə lazımdır? Jurnalistlər hər şeyi olduğu kimi yazmalıdırlar. Reytinq xətrinə başqalarını pis vəziyyətdə qoymaq olmaz”.
Qeyd edək ki, sonradan həmin məlumatın verildiyi saytda Elza Seyidcahanın imzaları Dairə Seçki Komissiyasına təqdim etməsi ilə bağlı açıqlamasında anlaşılmazlığın olduğu, müğənninin seçicilərinin ona “on min əlli deyil”, “on əllə səs verəcəyi” ifadəsini işlətdiyi vurğulanıb.
Ölkə.Az
