Politoloq: \"Bu vəziyyətdə nüvə müharibəsi hər an başlaya bilər\"

Rusiyanın Suriyadakı əməliyyatları dünyada birmənalı qarşılanmayıb.

Suriya prezidenti Bəşər Əsəd bildirib ki, Rusiya Yaxın Şərqi terrorizmdən xilas edəcək, Rusiyanın hərbi kampaniyası Suriyada uğur qazanacaq, çünki İran da daxil olmaqla beynəlxalq dəstəyə malikdir.

Qərb dövlətləri isə Rusiyanın bu hərəkətini kəskin suratdə pisləyirlər.

Suriyada baş verən prosesləri politoloq Elman Nəsirov Ölkə.Az-a şərh edib:

"Sentyabr ayının 28-də Putinin BMT Baş Məclisindəki məlum çıxışından sonra Rusiyanın hərbi hava qüvvələri sentyabr ayının 30-dan başlayaraq Suriyadakı İŞİD terror qruplaşmasını hədəfə aldı. Rusiyanın bu hərəkətinə birmənalı reaksiya yoxdur. Qərb dövlətləri bu hadisəni pisləyir. Qərb dövlətləri iddia edir ki, Rusiya əslində İŞİD-ə qarşı döyüşmür, Bəşər Əsədə qarşı döyüşən qüvvələri, ilk növbədə Suriya Azadlıq Ordusunu hədəfə alıb. Rusiyanın əsas məqsədi Bəşər Əsəd hakimiyyətini qoruyub saxlamaq və Suriya vasitəsi ilə regionda güclənmək istəyir.

Qərbin bu reaksiyasına Rusiyanın cavab reaksiyası özünü çox gözlətmədi. Putin bəyan etdi ki, bu yanaşma kökündən yalnışdır. Eyni zamanda Putin qeyd etdi ki, Rusiyanın yox, Qərbin Suriyada endirdiyi hava zərbələri qeyri-qanunidir. İki halda dövlət və koalisiya bu və ya digər dövlətin ərazisinə müdaxilə edə bilər. Birincisi: BMT Təhlükəsizlik Şurasının müvafiq qətnaməsi. İkincisi: Qarşı tərəfin hökuməti bunu xahiş etdikdə. Putin bildirdi ki, indiki halda Suriya ilə bağlı Bəşər Əsəd hökumətinin Rusiyadan məlum xahişi var. Suriya hökuməti hərbi yardımla bağlı Rusiyaya müraciət edib və bu müraciətə Rusiya müsbət cavab verib. Qərbin Suriyanı bombalaması isə qeyri-qanunidir. Bununla bağlı nə BMT Təhlükəsizlik Şurasının qətnaməsi var, nə də Bəşər Əsədin bununla bağlı xahişi var.

Bu əməliyyatlarda Rusiya hərbi hava qüvvələrinin 50-yə yaxın qırıcısı iştirak edir. Suriyadakı əməliyyatlarında Rusiyaya kəşfiyyat məlumatlarını İran, Suriya və İraqın hərbçilərinin verdiyi iddia edilir. Bununla bağlı Qərb dövlətləri heç bir dəstək verməyiblər. Regionda nüfuz uğrunda çox ciddi mübarizəyə start verilib. Rusiya bu prosesdə özünün strateji maraqlarını müdafiə etməkdə israrlı görünür. Bugün Qərb mətbuatı Barak Obamanı daha çox tənqid edir ki, Obama 2016-cı ildə vəzifəsi ilə vidalaşacaq və o, "axsayan ördəkdir", qətiyyəti yoxdur. Obamanın qətiyyətsizliyi Putini daha çevik hərəkətlər etməyə sövq edir.

Dünyamız heç zaman olmadığı qədər təhlükəli bir dövrə daxil olub. ABŞ və Rusiya nüvə dövlətləri olaraq strateji silahların məhdudlaşdırılması və digər hərbi yöndə olan müqavilələrdən imtina ediblər. Bu vəziyyətdə nüvə müharibəsinin başlanması hər an ola bilər. Əslində Suriyada aparılan mübarizə Qərbin və Rusiyanın Yaxın Şərqdə nüfuz mübarizəsinin bir təsdiqi kimi də dəyərləndirilə bilər. Qərb ekspertləri etiraf edirlər ki, Rusiya heç zaman olmadığı qədər fəal və qətiyyətlidir. Xüsusilə bu məsələlərdə rus xalqı Putini müdafiə edir. Qərbin Rusiyaya tətbiq etdiyi sanksiyalar lazımi effekti verməyib. Əgər effektli olsa idi, Rusiyanın Suriyada hərbi əməliyyatlar keçirməsi müşahidə olunmazdı.

Bu vəziyyətdə Üçüncü dünya müharibəsi olması təhlükəsi var. İndiki vəziyyətdə həm Rusiya, həm də ABŞ üçün əsas məqsəd nüvə bombasının terrorçuların əlinə keçməməsidir".

Səxavət Məmməd
Ölkə.Az