Araz Əlizadə: "Şər-böhtan atanın İqbal Ağazadənin özü olduğu sübut olundu"

Bu günlərdə deputlağa namizəd, Azərbaycan Sosial Demokrat Partiyasının sədri Araz Əlizadə Ümid partiyasının sədri İqbal Ağazadə haqqında Aznews.az-a qalmaqallı açıqlama verib.

Araz Əlizadə bildirib ki, "Təbliğat kampaniyası oktyabrın 9-dan başlayır. İqbal Ağazadə isə oktyabrın 1-dən ərazidəki hər yerdə asfalt çəkdirir, yelləncəklər düzəltdirir və s. Bu isə seçki qanunvericiliyinə ziddir, həm də maddiyyatla seçiciləri ələ almaq cəhdidir".

Araz Əlizadəyə cavab olaraq İqbal Ağazadə öz növbəsində bildirib ki, "Araz Əlizadə şər-böhtanla məşğul olmasın. Bu gün cəmiyyətdə şər-böhtanın ucu-bucağı yoxdur. Bununla bağlı Dairə Seçki Komissiyasına məktubum ünvanlanıb. Bundan əvvəlki illərdə millət vəkili dönəmində rəsmi strukturlara məktubla müraciət etmişəm. İşlər həmin məktublar əsasında görülüb".

Bu gün Araz Əlizadə rəqibi ilə arasında baş verənlərə Ölkə.Az-a verdiyi açıqlamasında aydınlıq gətirib.

Azərbaycan Sosial Demokrat Partiyasının sədri Araz Əlizadənin Ölkə.Az-a verdiyi məlumata görə, dünən İqbal Ağazadənin səlahiyyətli nümayəndəsinin iştirakı ilə Dairə seçki komisiyasında İqbal Ağazadənin seçki kampaniyasının şərtlərini pozması məsələsinə baxılıb və İqbal Ağazadəyə rəsmi xəbərdarlıq olunub.

Araz Əlizadə: "Buradan da görürsünüz ki, yalan danışan, şər-böhtan atan İqbal Ağazadədir. Dairə seçki komisiyasının iclasında şəkillər ortaya qoyuldu. Orada işləyən maşınlar və material İqbal Ağazadənin qardaşının zavoduna məxsusdur. Orada işləyən işçilər də İqbal Ağazadənin qardaşı İlqar Ağazadənin işçiləridir".

Xatırladırıq ki, Ümid partiyasının sədri İqbal Ağazadə və Azərbaycan Sosial Demokrat Partiyasının sədri Araz Əlizadə, hər ikisi 35 saylı Xətai seçki dairəsindən namizədliklərini veriblər və deputatlıq uğurunda onların arasında ciddi rəqabət olacağı gözlənilir.

Səxavət Məmməd
Ölkə.Az