Rasim Musabəyov: \"Bağışdıyuz, mən sizə intervü verə bilmiyəciyəm\"
"Mən nə sizin saytı tanıyıram, nə də sizi tanıyıram"
Bu sözlərin müəllifi lal, kar, kor deputatlardan biri olsa adamı yandırmaz. Bunu Azərbaycanın tanınmmış politoloqu, deputat Rasim Musabəyov Reaksiya.az saytının müxbirinə deyib. Özü də hal bir yox, bir neçə dəfə və başqa-başqa media orqanlarının jurnalistləri ilə təkrarlanıb.
Ölkə.Az deputatların 5 il ərzində nələrlə yadda qaldığını araşdırır. Bugünkü yazımızın qəhrəmanı deputat Rasim Musabəyovdur.
Rasim Musabəyov 2010-cu ildə 18 saylı Nərimanov - Nizami seçki dairəsindən deputat seçilib. Buna qədər Rasim Musabəyov mətbuatla belə desək arası çox yaxşı olub. Tez-tez çap və elektron media orqanlarına böyük həvəslə müsahibə və açıqlamalar verən, TV-lərdə hadisələrə şərv verən Rasim Musabəyov loru dildə desək deputat seçiləndən sonra "heç kəsi tanımadı".
Son zamanlar Rasim Musabəyova hansısa hadisəni şərh etmək üçün zəng edən jurnalistin telefon danışığı təxminən bu cür olur:
"- Alo, tanışuq?
- Xeyir Rasim müəllim. Filan saytdan, və yaxud qəzetdən, filankəsəm. Sizə bir neçə sualımız var.
- Bağışdıyuz, mən sizə intervü verə bilmiyəciyəm", deyib Rasim müəllim nəzakətsizcəsinə telefonu qapadır.
Dəfələrə bu hadisə baş verəndən və jurnalistlərin tənqidindən sonra deputat "facebook" hesabında bu məsələyə aydınlıq gətirir:
"Tanımadığım jurnalistlə danışmaqdan imtina etdiyimə görə narazılığını ifadə edib. Hətta jurnalistin tanınmağından asılı olmayaraq vəzifəli şəxsi cavab verməyi məcbur edən KİV haqqında qanuna da istinad edir. Bu qanuna istinad yetərincə deyil. Çünki mənim vəzifəli şəxs qismində deyil, politoloq kimi şərhlərim tələb olunur. Azərbaycanda 100-dək politologiya üzrə elmlər doktoru və professor var, və əgər jurnalist məhz mənə müraciət etməyi üstün tutubsa, yəqin mənim də hüququm var ki, müəyyənləşdirim, kiminlə ünsiyyətdə olmağa üstünlük verirəm".
Rasim müəllim unudur ki, bu siyasi elmlər üzrə professorların və doktorların heç də hamısı onun kimi müxalifət partiyasının funksioneri olmayıb, daha sonra partiyasından çıxıb deputat seçilməyib. Ona sual ünvanlayan jurnalist öncə bu kriteriyalara əsaslanaraq ona müraciət edir, əks təqdirdə gedib Elmlər Akademiyasının İnstitutlarında özü demişkən onlarla belə politoloq alim tapa bilərdi.
Həəə, Rasim müəllim tanımadığınız jurnalist və tanımadığınız sayt sizə və sizin savadınıza hörmət edib zəng edirsə və qarşılığında hörmətsizlik görürsə, niyə də haqqınızda tənqidi xəbər yazmasın? Məsələn, sizi tənqid edən tanınmış Azərbaycan jurnalistlərindən birinin öldürülməsi haqqında yazdığınız status hamının yadındadır.
Ümumiyyətlə təsir əks təsirə bərabərdir. Bu cür politoloqa heç bir jurnalist zəng etməsə, "facebook"da yazdıqlarını xəbər etməsə, sonda o, özü paşa-paşa mətbuata yalvaracaq.
Rasim Musabəyovdan mətbuat kimi seçiciləri də narazılıq edir. Onlar, seçdikləri deputatın qəbuluna düşə bilmədiklərindən dərdlərini deməyə adam tapmadıqlarından şikayətçidirlər.
Qısa arayış
Rasim Musabəyov 1951-ci ildə Bakı şəhərində anadan olub. 1968-ci ildə Azərbaycan Neft və Kimya İnstitutunun (indiki Neft Akademiyası) avtomatlaşdırma fakültəsinə daxil olub. Qərb meyilli deputat 1990 - 1991-ci illərdə isə Kommunist partiyası Bakı şəhər Komitəsinin ideoloji şöbəsinin müdiri işləyib. 1991-1992-ci illərdə Azərbaycan Respublikası Prezident aparatında millətlərarası münasibətlər üzrə müşavir işləyib. 1995-2005-ci illərdə "Müsavat" partiyasının Divan üzvü olub. 2005-2008-ci illərdə Azərbaycan Mətbuat Şurasının üzvü olub. 2010-cu ildə isə Milli Məclisin deputatı seçilib.
Son olaraq Rasim müəllimə bir sual daha ünvanlayırıq. Hörmətli deputat, jurnalistlər sizinlə necə tanış ola bilər? Bu sualımıza cavab verin ki, biz də işimizi bilək...
Ölkə.Az
