\"Faktiki olaraq Üçüncü dünya müharibəsi başlayıb\"

"ABŞ, Avropa və Türkiyə nə qədər İraq və Suriyaya bomba atsa da, məqsədləri İŞİD-i məhv etmək deyil"

Rusiyanın Suriyada keçirdiyi əməliyatlardan sonra Çinin də bu əməliyyatlara qoşulacağı haqda xəbərlər yayılmaqdadır. ABŞ, NATO buna nə qədər qarşı olsa da Rusiya İŞİD-i məhv etməkdə israrlıdır. Hətta İraqın baş naziri Heydər Əl-Abadi isə ABŞ-da "PBS NewsHour"da çıxış edərkən bildirib ki, Rusiya qoşunlarının İŞİD-lə mübarizə məqsədilə ölkəsinə daxil olmasına sevinəcək. Bunu isə ABŞ-ın həzm etməsi mümkünsüz görünür.

Yaxın Şərqdə baş verənləri politoloq Mübariz Əhmədoğlu Ölkə.Az-a verdiyi geniş açıqlamasında analiz edib:

Qərbin ötürməsi, Rusiyanın qolu

Çinin Suriyaya qoşun göndərməsi ilə bağlı məlumatlara inanmıram. Suriyada hal-hazırda Rusiyanın hərbi hava qüvvələri və dəniz qüvvələri mövcuddur. Gəmilərdə şəxsi heyət sayca çoxdur, ona görə də, kimsə istəsə deyə bilər ki, Rusiya Suriyaya quru qoşunlarını da göndərib. İran da Suriyaya qoşun göndərməyib. İranın əvvəldən orada SEPAH dəstələri var idi. Sadəcə İran orada olan dəstəni hal-hazırda leqallaşdırır. Suriyada Rusiya ilə İrandan başqa heç kəsin hərbi qüvvəsi yoxdur. Orada əsas proseslər Rusiya hərbi hava qüvvələrinin üzərindədir.

Rusiyanın Suryaya girməsindən sonra Türkiyə, Qərb və ABŞ-ın bu addıma müqaviməti gözlənilirdi. Qərb dövlətlərinin Yaxın Şərqlə bağlı böyük bir planı var idi. O plan bütün Yaxın Şərq regionundakı dövlətləri narahat edirdi. ABŞ və yaratdığı koalisiya İŞİD-ə qarşı mübarizə aparmadı. Vəziyyət elə oldu ki, Rusiya prosesə qoşuldu. Rusiyanın Yaxın Şərq siyasəti çox uğurludur. Rusiyanın yaxın Şərq uğuru, ABŞ və Qərbin səhvləri üzərində qurulub. Rusiyanın öz bacarığından çox, ABŞ-ın, Obamanın səhvləri önəm daşıyır. Putin Qərbin buraxdığı səhvlərdən çox böyük uğurla istifadə edir.

Bəşər Əsədə tabe olmayan bütün qüvvələr bombalanacaq

Putin Suriyaya girməmişdən əvvəl açıq-aşkar elan etdi ki, Bəşər Əsəd onun üçün legitimdir. Bəşər Əsədə tabe olan ordu legitim ordudur. Bu o deməkdir ki, Bəşər Əsəd hakimiyyətindən başqa digər təşkilatlar, siyasi qüvvlər Rusiya üçün qeyri-legitimdir. Rusiya yalnız Bəşər Əsədə tabe olmayan ordunu bombalamayacaq. Suriya Azadlıq Ordusu da, İŞİD-də, Ən-Nusra və digər nə qədər qruplaşmalar varsa, hamısı bombalanacaq.

Rusiya İraqa girməlidir

Suriyadan sonra Rusiya İraqa mütləq girməlidir. İraq özü Rusiyanı dəvət etməlidir. Hal-hazırda Suriya ilə İraq arasında İŞİD terrorçuları üçün sərhəd yoxdur. Bu gün Rusiya Suriyadakı İŞİD terrorçularını bombalayırsa, onlar sərbəst şəkildə İraqa keçib gizlənə bilərlər. Yaxın zamanlarda İraqın baş naziri Heydər Əl-Abadi Putinə müraciət göndərəcək, bəlkə də o müraciəti edib ki, Rusiya İŞİD-ə qarşı İraqda da əməliyatlara başlasın.

Rusiyanın Suriya siyasətinə qarşı ABŞ-ın Ukrayna "kozırı"

Rusiyanın Suriyada əməliyyatlar keçirdiyi bir vaxtda ABŞ Ukrayna məsələsini qızışdırıb. Son iki gündə ABŞ-ın Ukrayna ilə bağlı tələbləri dəyişib. Ona görə də Ukraynanı yenidən mitinqlər dalğası bürüyə bilər.

Türkiyənin dəyişkən siyasəti

Türkiyə əvvəlcə Rusiya ilə bağlı sərt bəyanatlar səsləndirirdi. Ancaq hazırda Türkiyə Rusiyaya dost ölkə deyir. Türkiyə yumuşaq dildə deyir ki, Rusiya gərək bizim sərhədlərimizi pozmasın. ABŞ-ın dövlət katibi Kerri Türkiyənin adından bəyanat səsləndirdi ki, "əgər Rusiya təyyarələri bir də Türkiyənin hava məkanını pozsa Türkiyə onları vura bilər". Ancaq bundan sonra yenə də Türkiyənin verdiyi bəyanatlarda, "dostluq", "qardaşlıq", "bizim yaxın iqtisadi əməkdaşlığımız var" kimi fikirlər səsləndirir. Türkiyə tərəfindən Rusiyaya hədə yoxdur, ancaq siyasi ritorika ortalıqdadır. Türkiyə elan etdi ki, Suriya məsələsində Türkiyə ilə Rusiyanın maraqları toqquşmur.

Elan olunmamış Üçüncü dünya müharibəsi

Ha-hazırda BMT bərbad gündədir. Ona görə ki, bir neçə ay ərzində 3 dövlət başqa 3 dözlətin ərazisinə qoşun yeridib. Hər kəs Rusiyadan danışır ki, Rusiya niyə Suriyaya qoşun yeridib? Rusiya Suriyaya qoşun yeritməmişdən bir qədər əvvəl Türkiyə İraqın ərazisinə qoşun yeritdi, Səudiyyə Ərəbistanı 10 minlik qoşununu Yəmənə yeritdi. Bunların heç biri ilə bağlı BMT Təhlükəsizlik Şurasının qərarı yoxdur. Faktiki olaraq üçüncü dünya müharibəsi başlayıb. Rusiya, ABŞ, NATO, Türkiyə və Yaxın Şərq dövlətlərinin iştirak etdiyi müharibə dünya müharibəsidir. Çin bu bölgəyə gəldi, ya gəlmədi müharibə başlayıb. Çindən hətta xahiş də etsələr öz ərazisindən kənarda heç bir hərbi qüvvədən istifadə etməyəcək. Çinin siyasəti bu günə qədər ona uğur gətirib. Çinin əsas silahı iqtisadiyyatı və investisiyasıdır. Rusiya Suriyaya girməkdə haqlıdır. Rusiya İŞİD-i yerində məhv edir ki, İŞİD Şimali Qafqaza, Azərbaycanın qonşuluğuna gəlməsin.

İŞİD-i kim yaradıb?

ABŞ-da respubilkaçılar deyir ki, İŞİD-i Bill Klinton yaradıb. Klinton isə bildirdi ki, bu Buşun dövründə yaranıb. İki Amerikalı siyasətçi etiraf edir ki, İŞİD-i ABŞ yaradıb. Sadəcə kimin yaratması üstündə mübahisə edirlər. İŞİD ABŞ-ın balasıdır, mübahisə onun üstündədir ki, onun ABŞ-dakı dədəsi kimdir, Buş, yoxsa Kilinton? İŞİD ABŞ-ın Yaxın Şərqdəki aktividir. ABŞ İŞİD vasitəsi ilə Yaxın Şərqdəki dövlətləri gərgin vəziyyətdə saxlayır. ABŞ, Avropa və Türkiyə nə qədər İraq və Suriyaya bomba atsalar da məqsədləri İŞİD-i məhv etmək deyil. Yeganə İŞİD-i sona qədər məhv etməyə siyasi iradəsi olan dövlət Rusiyadır. ABŞ İŞİD-i Rusiyanın da ərazisinə göndərə bilərdi, ona görə də, Rusiya İŞİD-i yerində vurur.

Səxavət Məmməd
Ölkə.Az