Ekspert: \"Xəzərdən Suriyaya raket atan Rusiya Azərbaycan və Qazaxıstanı məlumatlandırmalı idi\"
İŞİD-in Suriyadakı mövqelərinə yalnız qırıcılardan deyil, uzaq mənzilli raketlərdən istifadə edilməklə də zərbələr endirilib.
Rusiya prezidenti Putin bildirib ki, Suriyadakı hədəflər Xəzərdəki gəmilərdən buraxılan raketlərlə vurulub.
O, müdafiə naziri Sergey Şoyqunu qəbul edərkən deyib ki, Xəzər akvatoriyasında yerləşən raketdaşıyan kreyserlərdən 26 raket Suriya ərazisindəki İŞİD hədəflərini vurub. Putin bunu Rusiya hərbi sənaye kompleksinin və hərbi mütəxəssislərinin uğuru kimi qiymətləndirib.
Rusiyanın Xəzər akvatoriyasında yerləşən raketdaşıyan kreyserlərdən Suriyadakı İŞİD-ə məxsus obyektləri vurması məsələsinə hərbi ekspert Üzeyir Cəfərov Ölkə.Az-a verdiyi açıqlamasında aydınlıq gətirib.
"Xəzər dənizində Rusiyanın sualtı qayıqları, kreyserləri yoxdur ki, o məsafəni vura bilsin. Xəzər dənizinin yaxınlığında Həştarxan vilayətində Rusiyanın raket poliqonu var. Ola bilsin oranı nəzərdə tuturlar. Xəzər dənizindəki gəmilərdən Suriyadakı obyektlərə zərbələrin endirilməsinə inanmıram, bu günə qədər belə bir şey olmayıb. Xəzər dənizində Rusiyanın elə bir gəmisi yoxdur ki, raket atəşi ilə uzaq məsafəni vura bilsin.
Xəzər dənizindən Rusiyanın belə bir addım atmasından ən azı Azərbaycan və Qazaxıstanın məlumatı olmalı idi. Rusiya özbaşına istədiyini edə bilməz. Qəbul edilmiş qaydalar var, Rusiyanın bu qaydalara əməl etməsi birmənalıdır. Rusiya qaydaları pozarsa, ona qarşı diplomatik, narazılıq formasında irad bildirilməlidir. Rusiya Xəzər dənizində təlimlər keçirəndə ətraf dövlətləri diplomatik kanallarla xəbərdar edir. Rusiya Suriyaya raketlər atır, həmin hava məkanında isə mülki və hərbi təyarələr uçur bu mümkün deyil. Əgər belə bir şey olsa idi, ən azı Azərbaycan XİN və Müdafiə nazirliyi vasitəsi ilə xəbərdar edilməli idi".
Qeyd edək ki, Putinin sözlərinə görə Rusiyanın Xəzər donanmasının raket gəmilərindən buraxılan 26 ədəd "Kalibr" tipli raket Suriya ərazisindəki İŞİD-ə məxsus 11 obyekti məhv edib.
Səxavət Məmməd
Ölkə.Az
