Üzeyir Cəfərov: \"Cəmil Həsənlinin proqnozu düz çıxsa, ona düz bir həftə qonaqlıq verəcəm\"

Milli Şuranın sədri Cəmil Həsənli 1 noyabr parlament seçkilərində deputat olacaq şəxslərin siyahısını açıqlayıb.

Cəmil Həsənlinin açıqladığı siyahı ölkə mediasında ciddi müzakirə mövzusuna çevrilib.

Cəmil Həsənlinin açıqladığı siyahını deputatlığa namizəd, hərbi ekspert Üzeyir Cəfərov Ölkə.Az-a verdiyi açıqlamasında şərh edib:

"Milli Şuranın sədri Cəmil Həsənlinin 1 noyabr parlament seçkisində kimlərin seçiləcəyi ilə bağlı siyahı açıqlayıb, bütün 125 dairə üzrə. Mənim Cəmil Həsənliyə bir ziyalı kimi hörmətim var. Ancaq onun bu cür qeyri-ciddi siyahı ortaya çıxarması məndə təəssüf hissi doğurur. Ona görə ki, əvvəla seçkiyə hələ 22 gün qalıb. 22 gün sonra kimin bu marafonu necə keçəcəyi bəlli deyil. Ola bilsin kimlərsə namizədlikdən imtina etsinlər.

Konkret olaraq mənim təmsil olunduğum 33 saylı Xətai seçki dairəsindən Cəmil Həsənli Hüseyinbala Mirələmovun adını göstərib. Cəmil Həsənlini əmin edirəm ki, Hüseyinbala Mirələmov seçilməyəcək. Ona görə ki, imzatoplama ərəfəsində vətəndaşlarla söhbət etdim və məlum oldu ki, seçicilər bu adamın adını belə eşitmək istəmirlər. Birinci və ikinci dəfə seçiləndə sakinlər üçün xeyir-şər yerləri düzəltdirib. Ondan sonra isə Əhmədli kəndindən maşınla gətirdiyi boruları seçkinin səhərisi günü yenidən geri aparıb. Cəmil Həsənlinin proqnozlarından biri elə mənim namizəd olduğum dairədə səhv çıxacaq. Hüseyinbala Mirələmov üçün bu ilki seçki çox çətin olacaq.

Cəmil müəllim bir az səbr eltsə, noyabırın birinci həftəsində ilkin nəticələr bilinəcək. Əgər 125 dairə üzrə Cəmil Həsənlinin adlarını çəkdiyi şəxslər seçiləcəksə, Cəmil müəllimə bir həftə dalbadal, fassiləsiz qonaqlıq verməyə hazıram".

Qeyd edək ki, Parlament seçkiləri 1 noyabr tarixində keçiriləcək.

Səxavət Məmməd
Ölkə.Az