AGERPRES: Azərbaycandakı erməni milli azlığının da seçkilərdə iştirak hüququ təmin edilib
Rumıniyanın milli xəbər agentliyi AGERPRES Azərbaycanda keçirilən növbədənkənar prezident seçkiləri barədə məlumat verib.
AZƏRTAC-ın məlumatına görə, yazıda qeyd olunub ki, bu seçkilərin digərlərindən fərqi onun müstəqil Azərbaycanın tarixində ilk dəfə olaraq suveren dövlətin bütün ərazisini əhatə etməsindən ibarətdir. Belə ki, 2023-cü ilin sentyabr ayında keçirilmiş antiterror tədbirləri nəticəsində Azərbaycan müstəqilliklərini qazandıqdan sonra bənzər problemləri yaşayan Moldova, Gürcüstan və Ukrayna kimi ölkələrin sırasından ayrılaraq ərazi bütövlüyünün tam bərpasına nail olub.
Bildirilib ki, seçkilərdə 6 milyon 354 min 556 nəfər səsvermə hüququ olan Azərbaycan vətəndaşının iştirakı gözlənilir. Azərbaycan ərazisində yaşayan bütün etnik azlıqlarla yanaşı, erməni milli azlığının da seçkilərdə iştirak hüququ təmin edilib. Böyük Qayıdış proqramı çərçivəsində Xankəndi, Şuşa, Laçın, Kəlbəcər və digər azad edilmiş rayon və kəndlərdəki keçmiş məcburi köçkünlər də özlərinin ata-baba yurdlarında səs verəcəklər. Həmin ərazilərdə yaradılmış 26 seçki məntəqəsində milli mənsubiyyətindən asılı olmayaraq 23 minə yaxın seçici konstitusion hüququndan istifadə edəcək.
Həmçinin qeyd olunub ki, Azərbaycan sərhədlərindən kənarda yaşayan ölkə vətəndaşlarının da səsvermə prosesində fəallıq göstərməsi gözlənilir. Onlar üçün müxtəlif dünya ölkələrində, o cümlədən Avropa dövlətlərində - Fransa, Böyük Britaniya, Almaniya, Polşa, Çexiya, Avstriya, Macarıstan, Bolqarıstan, Rumıniya, eləcə də Moldova Respublikasında, habelə Azərbaycan digər ölkələrdəki diplomatik nümayəndəliklərində səsvermə məntəqələri təsis edilib.
