Ruslan İzzətli: \"Məntəqələrin birində dedilər ki, Mirələmovun seçki saxtakarlığını etməkdən yorulmuşuq\"

"Məntəqələrin birində dedilər ki, Hüseynbala Mirələmovun seçki saxtakarlığını etməkdən yorulmuşuq"

Namizədlərin seçki kampaniyasına start verdiyi bir dönəmdə Milli Şura sədri Cəmil Həsənlinin yaydığı siyahı bir çox namizəd tərəfindən narazılıqla qarşılanıb, bəziləri isə bunu qəbul edib.

Seçkilərdə ən ağır mübarizənin gedəcəyi dairələrdən biri 33 saylı Xətai dairəsidir. Bu dairədən namizədliyini irəli sürən D18 Hərəkatının sədri Ruslan İzzətli həm seçki kampaniyası, həm rəqibləri, həm də Cəmil Həsənlinin yaydığı siyahı barədə fikirlərini Ölkə.Az-la bölüşüb:

"D18 hərəkatı 33 saylı Xətai dairəsində bütün məntəqələr üzrə seçki şüarımızı yayıb. Seçki qərargahımız sosial şəbəkələr vasitəsi ilə qərargahımızın iş qrafikini yaydı. Seçki dövründə bütün məntəqələrə posterlərimiz iki formada yayılacaq. Bir seçki kampaniyası başlayan zaman, bir də seçki gününə bir neçə gün qalmış ikinci çağırış posterlərimiz olacaq. 10 min ailəyə çatdıracağımız çap materiallarımız olacaq, bu da 20-30 min seçiciyə informasiyanın çatması deməkdir. Posterlərin yapışdırılması zamanı seçicilərlə məhəllə görüşlərində iştirak etdim. Dairədə böyük bir mitinq etməyi düşünürük. Bundan əlavə məhəllə görüşlərimiz olacaq. Seçki qərargahımız Azərbaycanda ilk dəfə seçim musiqisi hazırlayıb. Bu model bir çox ölkələrdə, eləcə də Türkiyədə var. Seçki musiqimizin səsləndiyi və üzərində posterlərimizin asıldığı seçim avtomobili dairədə 23 gün ərzində gəzəcək və insanlara mesajımızı çatdıracağıq. Seçki günü isə 36 məntəqədə müşahidəçilərimiz və səlahiyyətli nümayəndəmiz seçkilərə nəzarət edəcək.

Bir çox məktəbdə görüş keçirəndə dedilər ki, Hüseynbala Mirələmov yenə də namizədliyini verib? Məntəqələrin birində isə dedilər ki, Hüseynbala Mirələmovun seçki saxtakarlığını etməkdən yorulmuşuq. Hüseybala Mirələmovun 2010-cu ildə seçilməsi haqqında Avropa İnsan Hüquqları məhkəməsi qərar verib. Azərbaycanı 30 min manat dəyərində cərimələdilər. Hüseynbala Mirələmovun nə dairəyə nə də cəmiyyətə 30 manat dəyərində xeyri yoxdur. YAP Hüseynbala Mirələmovun namizədliyini irəli sürməkdə səhv edib.

Cəmil Həsənli parlamentə düşəcək şəxslərin siyahısını açıqladı. Bir çox mətbu orqan bunu "şok siyahı" deyə yayımladı. O siyahıda şok bir məsələ yoxdur. O siyahı hər kəsin öncədən bildiyi bir məsələdir. Cəmil Həsənlinin qatıldığı 2005-ci il seçkilərində də, 2010 seçkilərində də eyni bu dəfəki kimi proqnozlar verilmişdi. 2005-ci il parlament seçkilərində də, Cəmil Həsənli eyni siyahı ilə parlamentə düşüb. Biri var kənarda durub tənqid etmək, biri də var komanda hazırlayıb insanlarla işləmək. Cəmil Həsənlinin siyahısı ilə mən də razıyam..."

Qeyd edək ki, Ruslan İzzətli 33 saylı Xətai dairəsindən namizədliyini irəli sürüb.

Səxavət Məmməd
Ölkə.Az