\"Müharibə bir güllə ilə başlayır, o yer hər şeydən xəbər verir\"

Xəbər verdiyimiz kimi, bu gün Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Dövlət Sərhəd Xidmətinin Sərhəd Qoşunlarının Zəngilan rayonunun Kolluqışlaq kəndi ərazisində yerləşən mövqeyinə açılan atəş nəticəsində hərbi qulluqçumuz yaralanıb. 

Ölkə.Az xəbər verir ki, hadisəni şərh edən beynəlxalq münasibətlər üzrə ekspert Əziz Əlibəyli bildirib ki, müharibə adətən bir güllə atmaqla başlayır: "Demirəm ki, müharibə və ya aktiv müharibə olacaq. 5 aydan sonra və ya yeni ildə ilk sabitliyi pozma olayı oldu. Hadisənin coğrafiyası çox şeydən xəbər verir. Azərbaycan Xarici İşlər Nazirliyi bəyanatında dəqiq ifadələrə işarə ilə bunun sülh prosesinə zərbə olduğunu açıqladı. Bu hadisələr Nikol Paşinyanın ölkəsini silahlandırılmamasına başlaması prosesinin fonunda baş verdi. Nəticəni təsəvvür etmək problem deyil".

Məlumata əsasən, atəş Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən açılıb. Təxribat nəticəsində Dövlət Sərhəd Xidmətinin hərbi qulluqçusu əsgər Xəlilzadə Pərviz Ağakişi oğlu yaralanıb. 

Ermənistan hərbi idarəsinin bəyanatında deyilir ki, Ermənistan Müdafiə Nazirliyinin hərbi polisi sərhəddə azərbaycanlı hərbçinin yaralanması barədə məlumatı araşdırır.

“Ermənistan və Azərbaycan dövlət sərhədində erməni sərhədçiləri tərəfindən atəş açılması ilə bağlı Azərbaycan mətbuatında yayılan məlumatlar araşdırılır. Bu hal təsdiq olunarsa, məsuliyyət daşıyan şəxslər cəzalandırılacaq”, - bəyanatda deyilir.

Azərbaycan Xarici İşlər Nazirliyi məlumat yayıb ki, Ermənistan tərəfinin bu təxribatı Azərbaycan-Ermənistan arasında sülh prosesinə ciddi zərbədir.

Bildirilib ki, son 4-5 ay ərzində sabitliyin hökm sürdüyü bir mühitdə bu kimi təhrikedici əməllər Ermənistan tərəfindən bəyan edilən sülh mesajları ilə açıq-aşkar ziddiyyət təşkil edir.

Eyni zamanda, bu kimi təxribatın məhz Ermənistandakı Avropa İttifaqı Missiyasının müşahidə həyata keçirdiyi ərazidən baş verməsi bu missiyanın məqsəd və məramlarına dair ciddi suallar yaradır.

Azərbaycana qarşı baş verən bu kimi təxribatlara görə Ermənistanın hərbi-siyasi rəhbərliyi məsuliyyət daşıyır.