Əliyevin görüşləri erməniləri dəli edib: Qışın oğlan çağında \"soyuq duş\"...

Azərbaycan Prezidenti İlham Əliyevin Almaniyada Münhen Təhlükəsizlik Konfransında yüksək səviyyədə iştirakı erməniləri əməlli-başlı dəli edib və özlərindən çıxarıb. Azərbaycan Prezidentinin seçkilərdən sonra ilk səfərinin Almaniyaya reallaşması və onun erməni tərəfinin "gözləntisinin" əksinə olaraq Qərb dairələri tərəfindən ən nüfuzlu nümayəndə kimi qəbul edilərək Qərb ölkələrinin ən yüksəksəviyyəli rəsmiləri qışın bu oğlan çağında onlara "soyuq duş" effekti verib. 

Erməni tərəfini dəli edən  və özündən çıxaran əsas məqam isə ondan ibarətdir ki, bu görüşlərin daha çox qarşı tərəfin istəyi əsasında baş tutmasıdır. Çox güman, erməni tərəfi hesab edirdi ki, 7 fevral seçkilərindən sonra Qərbin Azərbaycana münasibəti fərqli olacaq. Lakin onlar bu düşüncələrində yanıldılar. Ermənilər bir daha gördülər ki, Ermənistan bölgədə maraqlarını təmin edən güclər  və qüvvələr üçün bir alətdən başqa bir şey deyil. 

7 fevral seçkilərinin nəticələri bunu bir daha sübut etdi. Dünya bir daha Azərbaycanın hansı gücə və qüdrətə sahib olduğunu gördü. Qərbin seçkidən öncə Azərbaycana qarşı təzyiq taktikası nəticə vermədi və çox qısa zaman kəsiyində planları iflasa uğradı. Belə demək mümkünsə, bundan daha çox itirən, imicinə xələl gələn tərəf Qərb və onun beynəlxalq səviyyəli təşkilatları oldu. 
Bu baxımdan həmin güclər "Ermənistan kartı"ndan Azərbaycana qarşı təzyiq vasitəsi kimi istifadədə keçərli olmadığını görəndə məcbur olub bərabərhüquqlu səviyyədə Bakı ilə münasibətlərini tənzimləməyə çalışırlar.  
Münhen Təhlükəsizlik Konfransı çərçivəsində istər Qərb ölkələrinin liderləri, yüksəkranqlı rəsmiləri, istərsə də nüfuzlu dünya səviyyəli şirkət rəhbərləri və banklarının rəhbərlərinin Azərbaycan Prezidenti ilə   görüşə ciddi cəhd etmələri və səmimi ortamda keçən bu görüşlər də bunun göstəricisidir. Bu da erməni tərəfinin ciddi qısqanclığına və qəzəbinə səbəb olub.  
Əslində onlar dünya güclərinin əlində alət olmasından pəjmürdədirlər. Onlar dünyada təkdirlər və  Azərbaycan güclü dövlətdir. Ona görə də dünya gücləri Azərbaycanla və onun İkinci Qarabağ savaşından sonra Cənubi Qafqazda yaratdığı reallıqla istəyindən asılı olmayaraq öz maraqları naminə hesablaşırlar. Və buna məcburdurlar. Çünki Azərbaycanın yaratdığı reallıq geriyədönməz xarakter alıb. Ona görə də   bölgədəki maraqlı güclər Azərbaycanın yaratdığı reallıqdan öz maraqları üçün faydalanmağa çalışır. Onu da yaxşı bilirlər ki, bu prosedən kənarda qalmaq və ya faydalanıb əməkdaşlıq etməmək yalnız onların ziyanınadır. İtirən tərəf özləri olacaqlarını yaxşı dərk edirlər. 
Erməni tərəfi və daha çox mediası kollektiv Qərbin  Azərbaycana  və onun liderinə belə isti münasibət göstərməsinə dözə bilməyərək hədyanlar yağdırmaqla məşğuldur. 
Seçim ermənilərindir: Ya kimlərinsə əlində alət olmaqda davam etməklə bu coğrafiyadakı mövcudluqlarını təhlükə altında qoymaq, ya da Azərbaycanın şərtlərini qəbul etməklə öz gələcək inkişaf talelərini müəyyən etməlidirlər.

Mürtəza
Ölkə.Az