Dünya bir daha Azərbaycanın mövqeyi ilə hesablaşmalı oldu - AÇIQLAMA

Azərbaycan Prezidenti İlham Əliyevin Münhen Təhlükəsizlik Konfransında iştirakı, keçirdiyi görüşlər və verdiyi bəyanatlar ölkəmizin gələcək inkişaf strategiyası baxımdan çox mühüm əhəmiyyət kəsb edir.

Bunu Ölkə.Az-a açıqlamasında deputat Arzu Nağıyev bildirib.

Onun sözlərinə görə, Prezident İlham Əliyevin Münhen Təhlükəsizlik Konfransı çərçivəsində çox məhsuldar görüşləri keçirildi. "Konfrans çərçivəsində cənab Prezidentin həm Qərb dövlətlərinin, həm də transmilli şirkət rəhbərləri ilə çoxsaylı görüşləri baş tutdu. Bu görüşlər Azərbaycanın haqq səsinin, eyni zamanda həm dünyada, həm də bölgədə baş verən proseslərlə bağlı beynəlxalq aləmə çatdırılması, həm də ölkəmizin gələcək inkişaf perspektivləri baxımdan mühüm əhəmiyyət kəsb edirdi", - o qeyd edib.

Deputat Azərbaycan Prezidentinin Paşinyanla görüşününün hər hansı vasitəçi olmadan keçirilməsinin çox mühüm önəm daşıdığını vurğulayıb: "Bu, bir daha Azərbaycanın verdiyi bəyanatlarda və sərgilədiyi mövqelərdə qətiyyətli olduğunu ortaya qoydu. Cənab Prezidentin andiçmə mərasimində səsləndirdiyi kimi, artıq Ermənistanla bağlı məsələ həllini tapdığından beynəlxalq aləmin gündəliyindən düşməli və qalan məsələlər iki ölkə arasında həllini tapmalıdır. Bu məsələdə hər hansı beynəlxalq vasitəçiyə ehtiyac yoxdur. Bu prinsiplər əsasında da Paşinyanla görüş keçirildi. Onu da qeyd etmək istərdim ki, bəzi Qərb dövlətləri də Bakı ilə İrəvan arasında ikitərəfli görüşlərdə və sülh müqaviləsinin imzalanmasında maraqlıdırlar".

Deputat onu da əlavə edib ki, Prezident hər bir görüşdə və toplantıda çıxışları zamanı mühüm əhəmiyyət kəsb edən mesajlar verir: "Münhendə də verilən mesajlar bu baxımdan əhəmiyyətlidir. 

Digər mühüm cəhət isə Azərbaycan Prezidentinin ATƏT sədri ilə görüşündə verdiyi mesajlar oldu. Xüsusən də cənab Prezidentin öz missiyasını həyata keçirə bilməyən ATƏT MQ həmsədrliyinin və bəzi qiymətverici komitələrin ləğvi ilə bağlı olan bəyanatlardır. Beynəlxalq aləm bir daha Azərbaycanın hansı qətiyyətinin və bununla hesablaşmanın zəruriliyinin şahidi oldu.

Bu mesajlar və bəyanatlar Azərbaycanın gələcək inkişaf perspektivi ilə bağlı müəyyənləşdirdiyi yol xəritəsinin mühüm komponentləri kimi dəyərləndirilməlidir. Bu səfər və verilən mesajlar bir daha Azərbaycanın suveren, təhlükəsizlik, gələcək inkişafı baxımdan mühüm əhəmiyyət kəsb etməklə yanaşı, müstəqil xarici siyasətinin olduğunu göstərdi".

Mürtəza
Ölkə.Az