Azərbaycanın Böyük Britaniyadakı səfiri xüsusi fəxri mükafatla təltif edilib

Böyük Britaniya Parlamentinin Lordlar Palatasında “British Community Honours Awards” (BCHA) təşkilatı tərəfindən mükafatlandırma mərasimi keçirilib.

Mərasimdə İngiltərə-Azərbaycan Cəmiyyətinin həmsədri, Lordlar Palatasının üzvü Lord German, Şahzadə Katerina və müxtəlif təşkilatların nümayəndələri iştirak ediblər.

Tədbirdə Azərbaycanın Böyük Britaniyadakı səfiri Tahir Tağızadə xüsusi fəxri mükafatla təltif edilib. Mükafatı təqdim edən təşkilatın rəhbəri Yasmin Sheikh bunun Azərbaycanın çoxəsrlik tarixi missiyasına, mədəniyyətlər arasında oynadığı körpü roluna verilmiş layiqli qiymət olduğunu bildirib.

Hər il ənənəvi olaraq keçirilən bu tədbirdə Böyük Britaniyada icmalar arasında dialoqun möhkəmləndirilməsinə və sosial inteqrasiyanın inkişaf etdirilməsinə töhfə verən siyasi-ictimai xadimlər və icma fəalları mükafatlandırılırlar.

On beş ildir ki, fəaliyyət göstərən BCHA hər il üç kateqoriya üzrə 20-dək mükafat təqdim edir. Təşkilat tərəfindən indiyə qədər təltif edilmiş tanınmış siyasi-ictimai xadimlər arasında İngiltərə Kilsəsinin rəhbəri, ölkənin dini liderlərindən olan arxiyepiskop R.Vilyams, ölkənin keçmiş baş prokuroru D.Griv, Mühafizəkarlar Partiyasının keçmiş sədri E. Piklz, Şahzadə Maykl Kent və başqaları var.AzərTaC

Ölkə.Az