Namizədlərə pulsuz efir vaxtı verilməməsinə partiya sədrlərindən

2015-ci il parlament seçkiləri bundan öncəki seçkilərdən fərqli olaraq pulsuz efir vaxtının olmayacağı ilə yadda qaldı. MSK qanunvericiliyə uyğun olaraq efir vaxtını yalnız YAP-a verdi. YAP isə bundan imtina etdi.

Pulsuz efir vaxtının verilməməsi namizədlər tərəfindən sərt tənqid edildi. Müsavat başqanı Arif Hacılı da namizədlərə pulsuz efir vaxtının verilməsini səhv addım hesab edərək bu qərarın doğru olmadığını bildirdi.

Qanunvericilikdə partiya və blokların 60-dan çox namizədi qeydə alındığı təqdirdə pulsuz efir vaxtı verildiyi yazılıb. Bəs bitərəflər, şəxsi təşəbbüsü ilə namizədliklərini verənlər nə etməlidir? Bu sual açıq olaraq qalır.

Pulsuz efir vaxtının verilməməsi məsələsinə Ana Vətən partiyasının sədri Fəzail Ağamalı və Azərbaycan Sosial Demokrat partiyasının sədri Araz Əlizadə Ölkə.Az-da münasibət bildirib.

Fəzail Ağamalı: "Azərbaycan qanunvericiliyində bu məsələ öz əksini tapıb. O halda ödənişsiz efir vaxtı verilir ki, bu və ya digər partiya və partiyalar blokunun 60-dan yuxarı dairədən namizədliyi qeydə alınır. Bu halda ödənişsiz efir vaxtı verilir. Bununla bağlı digər hallar Azərbaycan qanunvericiliyində öz təsdiqini tapmayıb. Keçən seçkilərdə tətbiq olunan ödənişsiz efir vaxtının verilməsi MSK sədri Məzahir Pənahovun şəxsi təşəbbüsü olub. Bu dəfə MSK sədri Məzahir Pənahov bu cür təşəbbüs irəli sürmürsə, Müsavat başqanı Arif Hacılının onun üzərinə getməyə heç bir haqqı yoxdur. İstənilən partiya 60-dan yuxarı dairədən namizədi qeydə alınsa, pulsuz efir vaxtından istifadə edə bilər. YAP belə bir efir vaxtı aldı, ancaq bundan imtina etdi".

Araz Əlizadə: "Pulsuz efir vaxtı verilməli idi. Pullu efir vaxtına elə bir qiymət qoyublar ki, onu ödəmək mümkün deyil. Vacib deyil ki, hər partiya 60-dan çox namizədinin qeydə alınmasına nail olsun. Böyük partiyalar var, kiçik partiyalar var. Bu qanun namizədlərin bərabərlik hüququnu pozur. Qanunda boşluqlar var. Partiyaları başa düşdük, bəs bitərəf namizədlər də var axı, onların günahı nədir? Ona görə də, bu seçkilərdə də namizədlərə pulsuz efir vaxtı verilməli idi".

Qeyd edək ki, 2015-ci il parlament seçkilərində yalnız YAP-ın 60-dan çox namizədi qeydə alınıb.

Səxavət Məmməd
Ölkə.Az