Politoloq: "Putin bu sərəncamla MDB dövlətlərini hədəf alıb"

Rusiya dövlət başçısı rusiyalı məmurlara Avrasiya İqtisadi İttifaqına daxil olmayan ölkələrin aviaşirkətlərinin xidmətlərindən istifadə etməyi qadağan edən sərəncam imzalayıb.

Putinin imzaladığı bu sərəncam Avrasiya İqtisadi İttifaqına daxil olmayan ölkələrə təzyiq kimi də qiymətləndirilir.

Rusiya prezidentinin imzaladığı bu sərəncamı politoloq Ərəstun Oruclu Ölkə.Az-a şərh edib:

"Əslində bu məntiqli bir sərəncamdır. Rusiya məmurları görünür çox uçuşlar edirlər. Bu da Rusiyanın dövlət büdcəsindən maliyyələşən uçuşlardır. Bu sərəncamın mahiyyəti bundan ibarətdir ki, biz öz xeyrimizi yalnız bizimlə iqtisadi müttəfiq olan, Avrasiya İqtisadi İttifaqına daxil olan dövlətlərə, onların şirkətlərinə veririk.

Burada başqa bir məntiq də var, Rusiyanın Avrasiya İqtisadi İttifaqına qoşulan dövlətlərə verəcəyi təkcə bundanmı ibarədir? Bu baxımdan xırda bir şey görünür. Bu sərəncam həm də müəyyən mənada mesajdır: "Bizimlə olmayanı bizə qarşı kimi qəbul edəcəyik".

Putinin imzaladığı bu sərəncam həm də sanksiyadır, ünvansız sanksiya. Ünvan bəllidir, ancaq çox genişdir. Bu sərəncamda konkret dövlətlər göstərilməyib, ancaq həm də hara ünvanlandığı bəllidir. Rusiya bu sərəncamla MDB dövlətlərini hədəf alıb".

Qeyd edək ki, Azərbaycan Avrasiya İqtisadi İttifaqına qoşulmayıb.

Səxavət Məmməd
Ölkə.Az