Razi Nurullayev: "Əli Kərimli bilsin ki, əsl AXCP budur"

Hər şey fevral ayının 19-u Əli Kərimli ilə görüşdən sonra baş verdi

Razi Nurullayev 19 fevral Əli Kərimli ilə görüşdən sonra partiyadan istefa verdi.

Ölkə.Az-a müsahibəsi zamanı Razi Nurullayev bildirdi ki, biz səninlə dostuq, neçə il yol gəlmişik. Ona görə də düşünürəm ki, biz sülh yolu ilə ayrılaq. Sən bəyanat yay ki, xəstəliyinlə bağlı siyasətdən çəkilirsən və qeyri-hökumət təşkilati yaradıb bu işlə məşğul olacaqsan. Biz də səni satqın elan etməyəcəyik, sənin üzərinə getməyəcəyik. Əgər etməsən, bizim yolumuzu bilirsən.

Bundan sonra Yeni Demokratiya Hərəkatı yaradan Razi Nurullayev siyasi fəaliyyətini davam etdirdi. Ancaq AXCP-dən çıxanlar Razi Nurullayevin ətrafına yığışdıqdan sonra qərar qəbul olunub ki, keçmiş cəbhəçilər elə yenidən AXCP adı altında fəaliyyət göstərsinlər. Bununla bağlı AXCP Etimad Qurultayı təşkil edildi.

Bu gün Səttar Bəhlulzadə adına Mədəniyyət Sarayında AXCP Etimad Qurultayı öz işinə başlayıb.

Ölkə.Az-ın reportyor qrupu da qurultayın fəaliyyətini yaxından izləyib. Qurultayda təxminən 1200 nəfər iştirak edib. Səttar Bəhlulzadə adına Mədəniyyət Sarayı Cəbhəçilər tərəfindən tamamilə dolub. Qurultayı AXCP EQTK-nin sədri Razi Nurullayev iştirakçıları salamlayaraq açıq elan edib. Bundan sonra dövlət himni səsləndirilib. AXCP EQTK-nin sədrinin təklifi ilə Azərbaycan Xalq Cümhuriyyətinin yaradıcısı Məhəmməd Əmin Rəsulzadənin, AXC-nin keçmiş sədri, ölkəmizin ikinci prezidenti Əbülfəz Elçibəyin, eləcə də torpaqlarımızın azadlığı və bütövlüyü uğrunda canlarını qurban verən şəhidlərin ruhu bir dəqiqəlik sükutla yad edilib. Razi Nurullayev bildirib ki, qurultayda 212 mandat sahibi iştirak edir. Gündəliyə əsasən qurultay Razi Nurullayevin məruzəsi ilə başlayıb.

Razi Nurullayev Etimad Qurultayında geniş nitqlə çıxıs edib: “Öncə bu suala cavab verim ki, biz niyə yarandıq və nə istəyirik? 1988-ci ildə başlayan Milli Azadlıq Hərəkatının qarşısına qoyduğu məqsəd və vəzifələr həyata keçirilməyib. Müstəqillik əldə olunub, ancaq sosial-siyasi, hüquqi vədlər yerinə yetirilməyib. Müxalifət olaraq xalqa verdiyimiz sözü tuta bilmədik. Xalqa vəd etdiyimiz ağ günü göstərə bilmədik. Birbaşa olaraq xalqın yanında ola bilmədik. Çox acı haldır ki, 10 illiklər ərzində xalqın yanında olduğu deyilən insanlar bunu edə bilmədi. Əbülfəz Elçibəyin yaratdığı AXC hər bir ailəni əhatə edirdi. Amma, bu gün belə deyil. Elçibəy xalqın adamı idi, səmimi idi, ürəyi xalqla vururdu. Fərqli düşünənlər ola bilərdi, o, çox humanist insan idi. Bu gün belə insanlara ehtiyac var. Zaman-zaman AXC partiyaya çevrildi, ancaq öhdəliklərini yerinə yetirə bilmədi, xalqdan ayrı düşdü. Bunun birbaşa günahkarı kimi Əli Kərimli və digər müxalifət liderlərini görürəm. 10 illiklərlə aparılan bir siyasət müsbət nəticələnmirsə, onlar kənara çəkilməli idilər. Bir lider söz verirsə, nəticə ilə bağlı öhdəlik götürürsə, xalqa vəd verirsə, nəticə göstərməlidir. Əks təqdirdə kənara çəkilməlidir. Bu gün 20 ildir nazir postu tutanlar, icra başçısı, nazir müavinləri var. Bu, bizə xoş deyil. Xalqın güzəranı xoş deyil. Xalqın yarıdan çoxu işsiz vəziyyətdədir, cibində 1 manat yoxdur. Budurmu siyasət? Əslində müxalifət olaraq xalqı arxasınca aparacaq insan olmadı. Kürsüdə oturmağa üstünlük verdilər. Xalq da nəticə olmadığına görə başsız qalıb, lider axtarır, yeni sima görmək istəyir, həyatının yaxşılaşmasını istəyir, bahalı maşınları görüb ürəyi bulanır, istəyir ki, uşağı yaxşı təhsil alsın, məmur övladı kimi xaricdə oxusun. İqtidarda təmsil olunanların yox, həm də müxalifət adına iddialı olan yalançı liderlərin də övladları xaricdə oxuyur, sosial problemləri yoxdur. Amma hər bir cəbhəçi zülm içində yaşayır, onlar isə boş vədlər verir. Biz ona görə yarandıq ki, buna yox deyək.

Xalqın ləyaqətli, savadlı insanları çoxdur. Xalqın adından danışa biləcək kifayət qədər gənclər var və onlar buradadır. O gənclər Etimad Qurultayındadır. Bu insanlar Azərbaycanın yeni tarixini yaradacaqlar. Dəyənək siyasətindən, ancaq fərdi maraqlar üzərində qurulan siyasətdən fərqlənəcək. Bütün idarələrdə, PA, MM-də gəncləşməyə ehtiyac var. O insanlar bu partiyadan çıxacaq. Bunun şahidi olacaqsınız. Bizim siyasətimiz nəticəsi, səviyyəsi, kübarlığı ilə fərqlənəcək".

Siyasi Məhbuslar haqqında

Onların günahı hakimiyyəti tənqid etmək olub, bu gün həbsdədirlər, hətta biz onların şəkillərini buradan asa bilmədik. Amma onlar bizim ürəyimizdədir, onların azadlığı üçün çalışacağıq. Bizim dostlarımız olan Seymur Həzi, Akif Yusifli, İntiqam Əliyev, Leyla Yunus, Arif Yunus, Xədicə İsmayıl, onlarla digər insanlar həbsxanadadır. Onlara azadlıq arzulayırıq. Valideynlərin göz yaşına yol vermək olmaz. Sabahdan daha çox zəmanəmizi buna sərf edəcəyik. Əldə etdiyimiz məlumata görə qurultaya siyasi məhbusların şəkillərini də gətirmək istəyiblər, ancaq heç bir nəşriyyat evi o şəkilləri çap etmək istəməyib...

Dağlıq Qarabağla bağlı mövqe

Biz heç bir zaman Qarabağ üzərindən çirkin oyuna gedə bilmərik. Hər qarış torpağımız əzizdir. Heç bir zaman, heç bir şərt altında Qarabağla bağlı bir kompromisə gedə bilmərik. Ərazi bütövlüyümüz ata-anamızdan, canımızdan, övladımızdan da müqəddəsdir.

Avropaya inteqrasiya

İnsanlar yaxşı həyat üçün Avropaya üz tutur. Səfirlik qarşısında növbədə dayananlar var. Avropada şəffaflıq, iş, gözəl təhsil, demokratiya, insan şəxsiyyətinə hörmət, qanun və qanunçuluq var. Ona görə də, Azərbaycan Avropanın bir hissəsi olmalıdır. Azərbaycanda saf, sivil, kübar bir dövlət yaratmalıyıq.

İqtisadiyyata yanaşma

İpoteka ala bilmir, hər kəs bankın girovuna çevrilib. İnsanlara daha çox sosial şərtlərlə kreditlər verilməli idi ki, insanlar girova çevrilməsin. Halbuki bunların heç biri olmadı və xalqın vəziyyəti günbəgün ağırlaşdı.

AXCP Etimad Qurultayında partiya sədrliyinə namizədlər Razi Nurullayev, Mehman Muradlı və Sahib Əliyev oldu.

Partiya sədrliyinə seçki 14:00-da başladı. Seçki gizli səsvermə yolu ilə keçirildi.

Qurultay istirakçıları yeni yaranan AXCP haqqında fikirlərini Ölkə.Az-la bölüşüb.

Dəyanət Babayev: "Yeni yaranan AXCP-də daha səmimi bir ortam olacağını gözləyirik. Səmimi ortam üçün buraya gəlmişəm".

Könül Məmmədova: "Razi Nurullayevin ideyalarını bəyənirəm. Həqiqətən onun siyasətdə müsbət yöndə bir dəyişiklik edəcəyinə inanıram. Onun verəcəyi bütün qərarların xalqın güzəranının yaxşılaşmasına xidmət edəcəyini düşünürəm. Bu yolda liderimizə də, partiyamıza da uğurlar arzulayıram".

 

Rahib Hacıyev:"Əli Kərimlinin komandasında yerlipərəstlik və haqsızlıqlar var idi. Sırf ona görə, Razi Nurullayevin yaratdığı AXCP-yə qoşuldum. Bütün gücümüzü mübarizə aparmağa qoyacağıq. Əli Kərimlinin komandasının dediyi kimi hakimiyyətə işləmirik".

Və Razi Nurullayev sədr oldu

14:45-də AXCP Etimad Qurultayında keçirilən səsvermədə 213 nəfərdən 209 nəfəri səsvermədə iştirak edib. 9 səs etibarsız olub. Razi Nurullayev 165, Mehman Muradlı 24, Səbuhi Əliyev 14 səs yığa bilib. 165 səslə Razi Nurullayev AXCP sədri seçildi.

Razi Nurullayev AXCP sədri seçildikdən sonra rəqibləri olan Mehman Muradlı və Səbuhi Əliyevi tribunaya dəvət etdi. Razi Nurullayev rəqiblərinin əlini sıxdı və bu günkü günü şərəfli tarix adlandırdı...

Son söz olaraq Razi Nurullayev xalqın yanında olacaqlarını bildirdi...

Razi Nurullayev üzünü auditoriyaya tutub dedi: "Əli Kərimli bilsin ki, əsl AXCP budur. Əli bəy, bu dəqiqə məni dinləyirsənsə istefa ver. Oradakı cəbhəçiləri də əsl AXCP-yə qoşulmağa dəvət edirəm".

AXCP-nin qurultayı Üzeyir Hacıbəyovun Uverturası ilə yekunlaşdı...

 

Səxavət Məmməd

Fotolar: Nurlan Gülməmmədov

Ölkə.Az