Özümə ad günü hədiyyəsi olaraq namizədliyimi geri götürürəm

Parlament seçkiləri yaxınlaşdıqca namizədlər arasında mübarizə getdikcə qızışır.

34 saylı Xətai dairəsindən namizədliyini vermiş Fatimə Hacıbəyli ilə Fuad Muradov arasında qızğın rəqabət gedirdi.

Ölkə.Az xəbər verir ki, Fatimə Hacıbəyli bu gün namizədliyini Fuad Muradovun lehinə geri götürüb.

Ölkə.Az-ın redaksiyasına gələn Fatimə Hacıbəyli bildirdi ki, Fuad Muradovun nümayəndələri ilə görüşüb.

"Görüş zamanı Fuad Muradovun proqramı və platforması ilə tanış oldum. Onun platforması məni çox razı saldı. Onun platforması ilə yaxından tanış olduqda gördüm ki, Fuad Muradovun layihəsi Xətai camaatına daha çox xeyir verəcək. Bundan sonra düşündüm və qərar verdim ki, namizədliyimi Fuad Muradovun xeyrinə geri götürüm. Ancaq bu o demək deyil ki, Xətai camaatının problemləri ilə maraqlanmayacam. Xətai camaatının problemləri mənim problemlərimdir. O problemləri gördükdə Fuad Muradov deputat seçiləcəyi təqdirdə birbaşa deyəcəm və problemlərin həllinə çalışacam. Bu barədə Fuad Muradovun nümayəndələrinə də dedim. Onlar da bildirdi ki, Fuad Muradov deputat seçiləcəyi təqdirdə Xətai camaatının problemləri ilə daim məşğul olacaq. Fuad Muradovun deputat seçiləcəyindən şübhəm yoxdur. Bu yolda ona uğurlar arzulayıram".

Qeyd edək ki, bu gün Fatimə Hacıbəylinin doğum günüdür. Fatimə Hacıbəyli bizə bildirdi ki, özümə ad günü hədiyyəsi olaraq namizədliyimi geri götürdüm.