Ermənistan parlamentində Azərbaycanla bağlı qapalı iclas: Deputatların telefonları alındı - YENİLƏNİB

Ermənistan parlamentində müxalifətin təşəbbüsü ilə çağırılan “Ermənistan və Azərbaycan arasında sərhədin delimitasiyası və demarkasiyası məsələləri” mövzusunda növbədənkənar iclası bağlı qapılar arxasında keçirilir.

Ölkə.Az xəbər verir ki, müxalifət  iclasın qapalı keçirilməsinə etiraz etsə də, səsəvermə nəticəsində iclasın qapalı keçirilməsi barədə qərar verilib.

Parlamentin spikeri Alen Simonyan da öz növbəsində iclasda iştirak hüququndan məhrum edilmiş deputatların adlarını açıqlayıb. Bu siyahıya keçmiş müdafiə naziri, “Ermənistan” müxalifət blokunun parlament fraksiyasının rəhbəri Seyran Ohanyan da daxildir.

“Hörmətlə, mən burada qərar vermirəm. Bu, parlamentin reqlamentinin tələbidir”, - deyə Simonyan sadalanan deputatların məxfi məlumatlara çıxışının olmadığını izah edib.

İclas başlamazdan öncə deputatların telefonları da alınıb.

Mürtəza
Ölkə.Az

***
Bu gün günün ikinci yarısında parlament müxalifətinin təşəbbüsü ilə Milli Məclisdə “Ermənistan Respublikası ilə Azərbaycan Respublikası arasında sərhədin delimitasiyası və demarkasiyasının əsas problemləri” mövzusunda növbədənkənar iclası keçiriləcək.

Ölkə.Az xəbər verir ki, “Ermənistan” və “Mənim şərəfim” fraksiyaları müzakirəyə baş nazirin müavini Mher Qriqoryanı və xarici işlər naziri Ararat Mirzoyanı dəvət ediblər. 

“Ermənistan” fraksiyasının katibi Artsvik Minasyan bildirib ki, hər iki məmur parlamentə gələcək.

Müxalifət görüşü açıq, hakimiyyət qapalı rejimdə keçirmək niyyətindədir. 

Minasyanın sözlərinə görə, bu məsələ  səsvermə yolu ilə həll olunacaq.

Mürtəza
Ölkə.Az