Bəşər Əsədin Rusiyaya səfər etmə səbəbi nədir?

Suriya prezidenti Bəşər Əsəd Moskvaya ani səfər edib

Kremlin mətbuat katibi Dmitri Peskov bildirib ki, danışıqlar uzun çəkib. Görüşdə terrorçu qruplarla mübarizə, həmçinin Suriya ordusunun hücum əməliyyatlarının davamiyyəti məsələləri haqda danışıqlar aparılıb.

Bəşər Əsədin Rusiya səfərini və bölgədə baş verən prosesləri Avrasiya İqtisadi Əməkdaşlıq Təşkilatı İnstitutunun ekspertlər şurasının üzvü politoloq Adıgözəl Məmmədov Ölkə.Az-a şərh edib:

"Rusiyanın Suriyada həyata keçirdiyi əməliyyatlar artıq müəyyən nəticələrini verir. Demək olar ki, İŞİD-in Suriyadakı bazaları, düşərgələri məhv edilib. Suriyada quru əməliyyatlarının keçirilməsi istiqamətində geniş miqyaslı hazırlıqlar aparılır. Faktiki olaraq İŞİD-in Suriyadan kənarlaşdırılması prosesinə start verilir. Bu istiqamətdə də bir çox nəticələr əldə olunub. Suriyada İŞİD-in alt yapısı tamamilə məhv edilib. İŞİD artıq bloklaşdırılıb. Sadəcə quru əməliyyatlarla İŞİDin tamamilə məhv edilməsi qalıb.

Bəşər Əsədin Rusiyaya səfər etməsi səbəbi əlbəttə ki, İŞİD-dən sonrakı Suriyanın taleyi ilə bağlıdır. Suriya İŞİD-dən təmizlənəndən və rejim tam bərpa olandan sonra regionda gözü olan qüvvələrin maraqları müzakirə edilib.

Quru əməliyyatlarını İrana bağlı qüvvələrlə Suriya əsgərlərini silahlandıraraq həyata keçirəcəklər. Hava əməliyyatlarını isə həmişəki kimi Rusiya həyata keçirəcək. Suriyada keçirilən əməliyyatları İraqda olan koordinasiya mərkəzi həyata keçirir. Koordinasiya mərkəzinə İraq, İran, Suriya və Rusiya daxildir. İraq koordinasiya mərkəzinin üzvü olduğu üçün ola bilsin bu əməliyyatlar İraqda da davam etsin".

Qeyd edək ki, Rusiya sentyabr ayının 30-dan Suriyada hava əməliyyatları həyata keçirir.

Səxavət Məmməd
Ölkə.Az