Əli Kərimli etdiyi qələtə görə nəyə görə üzr istəmək üçün mitinq planlaşdırmır? - Deputat
“Əli Kərimli etdiyi qələtə görə nəyə görə üzr istəmək üçün mitinq planlaşdırmır? Söhbət Fransanın Bakıdakı səfirini geri çağırmasından və bizdəki antimilli ünsürlərin mitinq hazırlığından gedir. Əlbəttə, ilk baxışda belə görünə bilər ki, Azərbaycanın onun yeritdiyi neokolonializm siyasəti və digər bəd əməllərinin ifşasından qıcıqlanan Fransa dözümsüzlük göstərərək belə bir cılızlığa yol verir”.
Ölkə.Az xəbər verir ki, bunu deputat Sahib Alıyev parlamentin bu gün keçirilən plenar iclasında deyib.
Onun fikrincə, Fransanın buradakı səfirini geri çağırmasının arxasında qərbdəki regionda bölücü xətlər çəkmək, dayanıqlı qarşıdurma plasdarmı yaratmaq yönündə kompleks addımlar atmağı planlaşladıranlara pionerlik etmək gizlənir.
“Aprelin 5-də Brüsseldə keçirilən üçlü görüşdə - üzərindən artıq sirr pərdəsi götürülən gizli sövdələşmə də bunu təsdiqləmirmi?
O planı hazırlayanlar istədiklərini asan reallaşdırsınlar deyə, bizdəki muzdlu nökərlərindən də faydalanmağa çalışırlar ki, mitinq ideyası da ona görə ortaya atılıb. “Milli Şura"dakılara mitinq keçirməyi tapşıranlar Azərbaycanda icitimai-siyasi sabitliyə mümkün qədər zərbə vurmaq və dövlətimizə təzyiq üçün əlavə fakt toplamaq niyyəti güdürlər”, - deputat qeyd edib.
O əlavə edib ki, müzəffər Ali Baş Komdandanımızı Azərbaycanı Rusiyanın müstəmləkəsinə çevirməkdə suçlandıran, sözügedən ölkənin Qarabağdakı hərbi kontingentinin buradan heç vaxt çıxmayacağını bildirən Əli Kərimli və yandaşları hər halda etdikləri qələtə görə üzr istəmək üçün mitinq planlaşdırmırlar: “İtinə “Qızıl” adı qoymaqla varlı görünməyə çalışan kasıbın məntiqilə çıxış edərək yığnaqlarını “Milli Şura” adlandıran antimilli ünsürləri yaxşı tanıdığımdan tam əminliklə deyirəm ki, onlar məhz zəfərimizlə barışmayanların diktəsi ilə onu gözdən salmağa çalışdıqlarını etirafdansa, həmən güclərin qanadı altında "miatsum"çuların Qarabağa gətirilmələri tələbini daha həvəslə səsləndirə bilərlər.
Bildirmək istəyirəm ki, Qarabağda “miatsum”çuların kökünün kəsilməsi “Dəmir Yumruğun”, Rusiya hərbi kontingentinin Azərbaycanı vaxtından əvvəl tərk etməsi isə “Dəmir İradə”nin xidmətidir. O iradənin yiyəsinə, uzun əsrlər “parçala hökm sür” siyasətinin yeridildiyi Qafqazda dayanıqlı sülh qurucusuna - cənab İlham Əliyevə eşq olsun!”
Mürtəza
Ölkə.Az
