Qırğızıstan Prezidenti Azərbaycana dövlət səfərinə gəlib - YENİLƏNİB
Qırğız Respublikasının Prezidenti Sadır Japarov aprelin 24-də Azərbaycan Respublikasına dövlət səfərinə gəlib.
Ölkə.az xəbər verir ki, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülüb.
Qırğız Respublikasının Prezidenti Sadır Japarovu Azərbaycan Respublikası Baş nazirinin müavini Şahin Mustafayev, xarici işlər nazirinin müavini Fariz Rzayev və digər rəsmi şəxslər qarşılayıblar.
***
Qırğızıstan Prezidenti Sadır Japarov Azərbaycana rəsmi səfərə yola düşüb.
Bu barədə məlumatı Qırğızıstan prezidentinin Mətbuat xidməti yayıb.
Bildirilir ki, Japarovun rəhbərlik etdiyi nümayəndə heyətinə 11 nazir və bir neçə dövlət rəsmisi daxildir.
Xatırladaq ki, Qırğızıstanın dövlət başçısı aprelin 24-25-də Azərbaycanda səfərdə olacaq. O, Bakıya səfəri çərçivəsində Azərbaycan Prezidenti İlham Əliyevlə danışıqlar aparacaq. Görüş zamanı iki və çoxtərəfli əməkdaşlığa dair aktual məsələlər müzakirə ediləcək. Japarovun, həmçinin Ağdamın Xıdırlı kəndində orta məktəbin təməlqoyma mərasimində iştirakı gözlənilir.
