Deputat: \"Sahibkarların MTN-ə çağrılması ənənəsi tamamilə dayandırılmalıdır\"

"MTN Azərbaycan vətəndaşlarını qorumaq əvəzinə, Azərbaycan insanına əzab verən bir qurum kimi tanınmamalıdır"

MTN-lə bağlı mediada durmadan xəbərlər yayılır. Yayılan xəbərlər dövlətin bel sütunu olan MTN-nin nüfuzuna çox ciddi zərər yetirir.

Bununla bağlı Milli Təhlükəsizlik Nazirliyinin İctimai Əlaqələr İdarəsi açıqlama yayıb. Açıqlamada bildirilir ki, son vaxtlar bir sıra dövri mətbuat və elektron informasiya vasitələrində intensiv surətdə yoxlanılmamış və həqiqətə uyğun olmayan, şayiə xarakterli məlumatlar verilir.

Millət vəkili Fazil Mustafa MTN ətrafında baş verən son prosesləri Ölkə.Az-a şərh edib:

"Mətbuatın bu məsələdə hər hansısa formada iştirakı məlumat azlığından irəli gəlir. Hazırkı vəziyyətdə şəffaflığın təmin olunmasına ehtiyac var. Dövlət sirləri ilə deyil, ayrı-ayrı sahibkarlara qarşı atılan addımların açıq şəkildə izahının verilməsi lazımdır. Bu indiki şərtlərə daha çox uyğundur. Təbii ki, mediada gedən informasiyalar doğru olmaya bilər. Yaxud, qərəzli və məqsədyönlü ola bilər. Bunlar gözlənilən şeylərdir. Ən azı qurumun etibarını zədələyən informasiyalar və ictimai rəy dəyişsin. Mədət Quliyevin indiki dövrdə MTN-ə rəhbərlik etməsi dəyişikliyə səbəb olacaq. Çünki Mədət Quliyev ictimai rəyi nəzərə alan yüksək rütbəli məmurdur. Öz işini də peşəkar səviyyədə bilən şəxslərdəndir. Ona görə də, bu istiqamətdə bəzi məsələlərə aydınlıq gətirilməsinə şahid olarıq. Medianı da hər hansısa bir yalnış və təhrif olunmuş informasiya yaymaq kimi tendensiyadan xilas etmiş olarlar. Hesab edirəm ki, indiki vəziyyətdə həm MTN-nin açıqlamasında, həm də medianın yanaşmasında haqlılıq payı var. Çünki, hər kəs bu qurumdan gələn informasiyaların nə dərəcədə həqiqətə uyğun olmasını təhlil edir. Hal-hazırda şəffaflıq mühitinə ehtiyac var. Çox güman ki, işlər artıq başlayandan sonra yəqin ki, bu istiqamətdə cəmiyyəti rahatladacaq ciddi açıqlamalar olacaq.

O fikirlə razı deyiləm ki, MTN-nin imici aşağı düşüb. Bu cür hadisələr hər bir qurumda ola bilər. Bu fikrin formalaşması ictimai və eləcə də parlament nəzarətin olmamasından irəli gəlir. Əsas odur ki, bundan sonra necə nəzarət mexanizmi işləyəcək. Çünki, nə qədər səlahiyyət varsa, ondan sui-istifadə halları da var. MTN rəhbərliyində olan bu dəyişiklik müsbət tendensiyanın əsasını qoya bilər. Mədət Quliyevin işlədiyi sahələrdə müsbət mənada xeyli dəyişikliklər baş verib. MTN-nin nüfuzunun bərpası daha çox MTN-nin yeni rəhbərliyinin necə addım atmasından asılı olacaq. Ən azı MTN-i öz funksiyasına qaytarmaq lazımdır. MTN kəşfiyyat və əks-kəşfiyyatla bağlı fəaliyyətə daha çox önəm verməlidir. MTN Azərbaycan vətəndaşlarını qorumaq əvəzinə, Azərbaycan insanına əzab verən bir qurum kimi tanınmamalıdır. Sahibkarların MTN-ə çağırılması ənənəsi tamamilə dayandırılmalıdır".

Qeyd edək ki, MTN-lə bağlı məlumatlar keçmiş nazir Eldar Mahmudovun vəzifədən azad edilməsindən sonra yayılmağa başlayıb.

Səxavət Məmməd
Ölkə.Az