Keçmiş kəşfiyyatçı: "MTN rəhbərliyinə ən yaxşı namizədlərdən biri..."

"Bu dönəmdə ya professional xüsusi xidmət işçisi, ya da ki siyasi fiqur MTN-ə şef gətirilməlidir"

MTN-nin İctimai Əlaqələr İdarəsi mətbuatı tənqid edici açıqlama yayımlayıb. Açıqlamada, "Son vaxtlar bir sıra dövri mətbuat və elektron informasiya vasitələrində intensiv surətdə yoxlanılmamış və həqiqətə uyğun olmayan, şayiə xarakterli məlumatlar verilir" deyilib. Pentensiar Xidmət rəisi Mədət Quliyev MTN-nin birinci müavini təyin edilib. Ancaq MTN şefi yeri hələ də boşdur. Bununla bağlı çoxsaylı versiyalar irəli sürülür.

Milli Təhlükəsizlik Nazirliyinin sabiq əməkdaşı, politoloq İlham İsmayıl MTN-lə bağlı baş verənləri Ölkə.Az-a şərh edib:

"Mətbuatın tənqidinə şans verməmək üçün mətbuat xidməti vasitəsi ilə məlumat yaymalı idilər. MTN-nin mətbuat xidməti baş verənlər barədə dəqiq, səlis məlumat verməli idi ki, bu gün media ilə qarşı-qarşıya qalmasın. MTN baş verənlərlə bağlı açıqlama verməyəndə, hətta həbslər barəsində yarımçıq məlumat yayanda mətbuatda istənilən versiyalar irəli sürülə bilər. Bunu mətbuatın qınaq hədəfinə çevirmək lazım deyil.

Mədət Quliyev müstəqilik və SSRİ dövründə DİN-in əməkdaşı olub. Sonra ədliyyə sistemində də işləyib. Mədət Quliyev ən yaxşı variantlardan biri idi. Ona görə ki, o, uzun müddət terrorizm və banditizmlə mübarizə idarəsində işləyib. Nizam-intizam sevən adamdır. İntellektual potensialı var. Bu təyinatı normal qarşılayıram. Ancaq bu iş tək Mədət Quliyevin öhdəsindən gələ biləcək bir iş deyil. Ona görə ki, xüsusi xidmət orqanının özünə məxsusluğu var. Xüsusi xidmət orqanı polis və digər orqanlardan tamamilə fərqlidir.

MTN-ə rəis haradan gəlirsə gəlsin, bircə polisdən gəlməsin. Çünki polisin ab-havası ilə xüsusi xidmət orqanının ab-havası qətiyyən uyğun deyil. Belə proseslərdə adətən xüsusi xidmət orqanının başına siyasi fiqur qoyulur. Dövlətin kursu müəyyən olunur, ancaq təbii ki, onu həyata keçirən peşəkar əməliyyatçılar olur. Zamanında Vaqif Hüseynov da bizə rəhbərlik edib. Vaqif Hüseynov partiya sistemindən gəlmişdi. Siyasi fiqur idi. Corc Buş Mərkəzi Kəşfiyyat İdarəsinin rəhbəri olub. Bu o demək deyil ki, ata Buş kəşfiyyatçı idi. O, siyasi fiqur idi və bilirdi ki, dövlətin qarşısında hansı vəzifələr var və Mərkəzi Kəşfiyyat İdarəsi də bunu necə yerinə yetirəcək. Bu dönəmdə ya professional xüsusi xidmət işçisi, ya da ki siyasi fiqur MTN-ə şef gətirilməlidir".

Qeyd edək ki, keçmiş MTN şefi Eldar Mahmudov 11 il xüsusi xidmət orqanına rəhbərlik edib.

Səxavət Məmməd
Ölkə.Az