Paşinyan üstünə su töküb sərhəddə olanları izah etdi - VİDEO

Ermənistanın Baş naziri Nikol Paşinyan dövlətlə bağlı tiktok hesabında çıxış edərkən hüquqi dövlət, suverenlik və ərazi bütövlüyü mövzusundan bəhs edib.

Ölkə.Az xəbər verir ki, onun sözlərinə görə, ərazisi dəqiqləşdirilməmiş suverenlik, hüquq, hətta dövlətçilik də eroziyaya uğrayır. "Yəni hüquq və vəzifələrin tətbiqi ərazinin spesifikliyi və ərazi bütövlüyü ilə birbaşa bağlıdır”, - Paşinyan bildirib.

Dediklərini aydın şəkildə izah etmək üçün stəkana su tökən Paşinyan söyləyib ki, burada hüquq və öhdəliklər var: "Əgər  bunlar düzgün qaydada yerləşdirilərsə, o zaman onlar tətbiq oluna bilər və həyat qabiliyyətliliyə malikdir. Biz onlardan həyatda ehtiyaclarımızı ödəmək üçün istifadə edə bilərik”.

Daha sonra isə Paşinyan qabdakı suyu masanın üzərinə töküb və nəticədə baş nazirin paltarı islanıb. 

"Sudan düzgün istifadə edə bilmədiyimizdən yararsız vəziyyətə düşərək problem yaratdı. Bax, dövlətin ərazisi bütövlüyü, suverenliyi müəyyən edilməyəndə, o da problemlər və diskomfort hissi yaradır.

Bizim də Tavuş bölgəsində demarkasiya və delimitasiya prosesi, sülh gündəmində gördüyümüz işin məqsədi məhz budur".

Mürtəza
Ölkə.Az