Almatı görüşü Cənubi Qafqazda tezliklə sülhə töhfə verəcək - Tokayev

Ermənistan və Azərbaycanın Almatıda xarici işlər nazirləri səviyyəsində danışıqların aparılmasına dair razılaşmasını alqışlayıram.

Ölkə.Az xəbər verir ki, bunu Qazaxıstan Prezidenti Kasım-Comart Tokayev deyib.

“Mən Ermənistan və Azərbaycanın Qazaxıstan tərəfinin iki dövlət arasında sülh müqaviləsinin hazırlanması üzrə xarici işlər nazirləri arasında danışıqların aparılması təklifi ilə bağlı razılığını alqışlayıram”, -  Tokayev bildirib.

O əlavə edib ki, bu mühüm hadisənin 1991-ci ilin dekabrında MDB ölkələrinin dövlətlərarası sərhədlərin müəyyən edilməsi prinsiplərini təsbit edən tarixi Alma-Ata Bəyannaməsinin imzalandığı Almatıda baş tutması rəmzi məna daşıyır. 

“Düşünürəm ki, görüş Ermənistan-Azərbaycan razılaşmalarının praktiki icrasına xidmət edəcək və Cənubi Qafqazda tezliklə dayanıqlı və uzunmüddətli sülhün bərqərar olmasına töhfə verəcək”, - Tokayev bildirib.

Mürtəza
Ölkə.Az