“Zəngəzur dəhlizi” bu tarixdə işə düşəcək - Nazir
Türkiyənin infrastruktur və nəqliyyat naziri “Zəngəzur dəhlizi”nin açılışının vaxtını açıqlayıb.
Ölkə.Az xəbər verir ki, nazir Əbdülqadir Uraloğlu “TGRT Haber”ə müsahibəsində "Zəngəzur dəhlizi"ində görülən işlər barəsində geniş açıqlama verib.
“Zəngəzur dəhlizi" dediyimiz layihə Bakıdan başlayıb Ermənistan və ya İran sərhədlərindən keçən, sonra Naxçıvandan keçərək Dilucu, İğdır, Qarsdan keçərək Sivasa birləşən layihədir. Ermənistanla sərhədə qədər avtomobil və dəmir yolunda tikinti işləri davam edir. Biz Ermənistan tərəfinin, o cümlədən baş nazirin bəyanatlarından xəbərdarıq, lakin bizim birbaşa əlaqəmiz yoxdur. Azərbaycan onlarla daha sıx danışıqlar aparır. Mən bilirəm ki, onlar İranla da danışıqlar aparırlar. Müəyyən bir uzlaşmaya gəliblər. Dəhlizin Ermənistandan, yoxsa İrandan keçəcəyinə yaxın vaxtlarda qərar veriləcək. Bu bizi türk dünyası ilə birbaşa bağlayacaq bir layihədir”, - deyə Uraoğlu bildirib.
Nazir onu da əlavə edib ki, adı çəkilən layihə 2028-2029-cu illərdə başa çatacaq.
“Naxçıvandan bir xətt var. İlk növbədə o, abadlaşdırılacaq, sonra yenidən tikiləcək. Tenderlər keçirilib, amma bu gün başlasaq, təxminən 5 il çəkəcək. Biz yəqin ki, 2028-2029-cu illərdə bu xəttin işə düşdüyünü görəcəyik”, - türkiyəli nazir bildirib.
Mürtəza
Ölkə.Az
