\"Yeni mövzu gündəmə gələndə tələsirik ki, təhsil sistemində daxil edək\"

Bu gün Elm və Təhsil Nazirliyi, Peşə Təhsili üzrə Dövlət Agentliyinin birgə təşkilatçılığı ilə “Yaşıl dünya naminə həmrəylik ili” çərçivəsində “Yaşıl artım gündəliyində təhsil” mövzusunda konfrans keçirilir.

Ölkə.Az xəbər verir ki, konfransda elm və təhsil naziri Emin Əmrullayev, həmçinin digər dövlət rəsmiləri, millət vəkilləri iştirak edir.

Birinci paneldə danışan Elm və təhsil naziri Emin Əmrullayev bildirib ki, yaşıl iqtisadiyyata keçid mövzusu olduqca vacibdir:

"O ki qaldı təhsil tərəfinə, inamım bundan ibarətdir ki, biz əsasən 3 vacib komponentdən danışırıq. Birincisi, xüsusilə Azərbaycan kontekstində olduqca vacibdir. Azərbaycan özünün miqyasına görə dünyada olan karbon tullantılarına o qədər də böyük "töhfə" verən ölkə deyil.  

Eyni zamanda da karbonun maliyyələşdirilməsi nöqteyi nəzərindən bu kifayət qədər ciddi maliyyə tələb edən bir sahədir. Məhz COP29-un ölkəmizdə keçirilməsində ən böyük imkanı təhsil sahəsində görürəm. Yaşıl keçid prosesi birmənalı olaraq, davranış dəyişiklikləri ilə daha çox bağlıdır deyə düşünürəm. Çünki sonda istər iqtisadi, istərsə də gündəlik həyat baxımından məhz növbəti nəsillərin məsələyə münasibəti bəlkə də ən vacib məqamdır. Bu davranışı məhz təhsil vasitəsilə qısa zaman ərzində dəyişmək mümkündür. Yəni birinci məsələ səriştələrdir. Daha çox vətəndaşın məsələyə münasibətidir. 

İkinci məqam, yəqin ki, bacarıqlardır. Bacarıqlar da birbaşa olaraq təhsillə əlaqədardır. Bu bacarıqlar özlüyündə təbii ki, səriştə ilə dəyərlərin yanında durur. 

Bu bacarıqlar da özlüyündə həm peşə təhsil sitemində, xüsusilə ali və ümumi təhsil sistemində formalaşmalıdır.
Üçüncü istiqamət isə elm və innovasiyalarla bağlıdır. Çünki bu istiqamətdə mütləq qaydada növbəti illərdə yenilikləri, müxtəlif innovativ tədbirləri görəcəyik və milli təhsil sistemi olaraq bu prosesdən uzaqda qalmamalıyıq.

Burada bir məsələni xüsusi vurğulamaq istəyirəm. Çünki biz bəzən yeni mövzu gündəmə gələndə və yaxud bu və ya digər mövzu aktuallaşanda dərhal tələsirik ki, o ada uyğun bir ixtisas yaradıb təhsil sistemində daxil edək. Və inanırıq ki, bununla da problemi həll edirik.

Bilməliyik ki, yaşıl iqtisadiyyat, bərpa olunan enerji və s. bu kimi mövzuların daha yaxşı anlamaq üçün, sadəcə olaraq, təhsil sistemində düzgün yanaşmalıyıq.

Kökündə duran məsələ fundamental fizika, kimya, biologiya, riyaziyyat və digər fənlərdir.

Yaşıl iqtisadiyyat üzrə bakalavr ixtisası açanda birinci məsələni həll etmirsənsə, məsələnin həllinə töhfə vermiş olmursan.

Yeni ixtisaslara həmişə ehtiyac var, amma nə ixtisas açılırsa açılsın innovasiya və kəşflərdən danışırıqsa, mütləq qaydada bunun kökündə duran fundamental elmlərdir".

Billurə Yunus