Mehriban Zeynalova: \"Mən təkcə qadınların səsi olmayacağam\"

Deputatlığa namizəd Mehriban Zeynalova 11 min seçici ailəsini ziyarət edib

“Millət vəkili olmaq seçkiqabağı vədlərlə vətəndaşları seçkiyə cəlb edib daha sonra 5 il müddətinə bir dəfə də olsun seçildiyi ərazinin hansısa probleminin həlli ilə məşğul olmamaq deyil. Millət vəkili olmaq nəinki ona etimad göstərən sakinlərin, ümumiyyətlə ölkənin inkişafı üçün çalışmaq deməkdir. Biz Mehriban Zeynalovanın məhz belə millət vəkili olacağına inanırıq”. 32 saylı Suraxanı Üçüncü Seçki Dairəsindən namizədliyi qeydə alınan, “Təmiz dünya” Qadınlara Yardım İctimai Birliyinin sədri Mehriban Zeynalovanın Bülbülə qəsəbəsində yerləşən seçki qərargahına gələn seçicilər Ölkə.Az-a belə deyib.

Hər gününü seçicilər arasında keçiriən Mehriban Zeynalovanın sözlərinə görə, təbliğat-təşviqat kampaniyası başlayan müddətdən bəri 11 min ailəni ziyarət edib: “Demək olar ki, hər evi gəzmişik, hər bir ailəni öz evində, küçəsində ziyarət etmişik. Maraqlıdır ki, seçicilər ilk dəfədir ki, namizədin onların ayağına gəldiyini görüb təəccüblənirlər. Onlar üçün bu, bəlkə də ilk idi. Namizəd onların evinə gəlir, hansısa yalançı vədlər vermir, görə biləcəyi işlərdən danışır və birgə bütün problemlərin həllinə nail olacaqlarına əmin edir”.

Parlament seçkilərinə məhz 32 saylı Suraxanı Üçüncü Seçki Dairəsindən qatılmasının səbəbinə gəlincə isə, namizəd bunu belə əsaslandırır: “Rəhbərlik etdiyim “Təmiz dünya” təşkilatı uzun illərdir ki, ölkədə qadın problemləri ilə məşğul olur. Qadın problemi demək isə həm də ailə, cəmiyyət problemi deməkdir. Diqqətimi məhz Suraxanı rayonundan daxil olan müraciətlərin çoxluğu çəkdi. Kiçik bir araşdırma apardım və bu ərazidə doğrudan da görüləcək çox işlərin olduğunu gördüm. Buna görə də Suraxanı sakinlərinin parlamentdəki səsi olmağa qərar verdim. Mən təkcə qadınların səsi olmayacağam. Həm də cəmiyyətin inkişafına bu rayonun sakinlərinin potensialından istifadə etməklə nail olacağımızı düşünürəm”.

Səxavət

Ölkə.Az