Politoloq: \"ABŞ əsgərinin çəkməsi Suriya torpağını tapdalayacaq\"

ABŞ Suriyada quru əməliyyatlar keçirməyə qərar verib

Pentaqonun rəhbəri Eşton Karter ABŞ ordusunun Suriya və İraqda hava zərbələri ilə yanaşı quru əməliyyatları da həyata keçirəcəyini bildirib. ABŞ rəhbərliyi Suriya və İraqda hava əməliyyatları keçirəcəklərini və yerüstü əməliyyatlar aparmayacaqlarını bəyan etmişdi.

ABŞ-la yanaşı Rusiya da sentyabr ayının 30-dan Suriyada hava əməliyyatları keçirir. Rusiya rəhbərliyi də Suriyada hava əməliyyatlarına başlayanda bu ölkədə quru əməliyyatlarının keçirilməyəcəyini bildirmişdi. ABŞ-ın quru əməliyyatlara başlama qərarı almasından sonra Rusiyanın atacağı addım da maraqla gözlənilir.

Suriya ətrafında baş verən prosesləri politoloq Zərdüşt Əlizadə Ölkə.Az-a şərh edib:

"Rusiya Suriyada hava əməliyyatlarına başlayanda ABŞ susmamışdı. Mütəmadi olaraq hər gün müxtəlif səviyyələrdə, dövlət katibinin sözcüsündən tutmuş, prezidentin özünə qədər həmişə buna münasibət bildirirdilər və münasibət həmişə mənfi idi. Lakin görəndə ki, Rusiyanın keçirdiyi hava əməliyyatları, Suriya ordusunun keçirdiyi əməliyyatlar və İranın müdaxiləsi daha da çoxalır, ABŞ-da qərar verdi ki, bu məsələdə paylarını artırsınlar. Ona görə də, əvvəlki quru əməliyyatlarının olmayacağı qərarında geri çəkilib, quru əməliyyatlarına başlayacaqlar.

Bəşər Əsəd demişdi ki, ABŞ əsgərinin çəkməsi Suriya torpağına dəyməyəcək. Ancaq indi görünür ki, ABŞ əsgərinin çəkməsi Suriya torpağını tapdalayacaq. Bölgədə vəziyyət çox gərgindir. İndiki zamanda hər şey regional dövlətlərdən asılıdır, nəinki ABŞ-dan. Rusiya ABŞ qarşıdurması göz önündədir. Ancaq çox yaxşı ki, bu qarşıdurma iki dövlətin toqquşması səviyyəsinə çatmayıb. ABŞ və Rusiya qoşunlarının Suriya ərazisindəki döyüşü istisna edilir".

Qeyd edək ki, Suriyada quru əməliyyatlarını İran və Hizbullah həyata keçirirdi.

Səxavət Məmməd
Ölkə.Az