Türkiyədə başladılan siyasi dialoq: Arxasında nə dayanır?

Türkiydə prezident Rəcəb Tayyib Ərdoğanın CHP lideri Özgür Özəl və İYİ Partiyanın sabiq sədri Meral Akşenərlə görüşü ölkə gündəmində ciddi rezonansa səbəb olub. Görüşlər haqqında müxtəlif fikirlər səsləndirilməkdədir.

Hesab etmək olar ki, bu görüşlər prezident Ərdoğan tərəfindən ölkədə siyasi qüvvələr arasında sağlam dialoqun və etimad mühitinin qurulmasına, ölkənin davamlı inkişafına töhfə verən siyasətdir.

Başladılan siyasi dialoq uğurla inkişaf etdiriləcək və bu, milli maraqlar, dövlətin strateji mənafeləri, Türkiyə dövlətçiliyinin gələcək inkişafı, dünyanın yenidən şəkillənməsində Türkiyənin qarşısında duran hədəflərə nail olunması baxımdan mühüm rol oynayacaq. Bu həm ölkədə yeni siyasi konfiqurasiyanın yaranmasına, son illərdə Türkiyə cəmiyyətində yaranan qütbləşmənin aradan qaldırılması, dövlətə yönəlik istənilən xarici təhlükələrə qarşı, milli maraqlar baxımdan siyasi qüvvələrin, eyni zamanda cəmiyyətin birliyinə, həmrəyliyinə nail olunması baxımdan təqdirəlayiq haldır. Çünki onilliklər boyu Türkiyəyə qarşı xarici təhdid və təhlükələrin şahidi olmaqdayıq. Türkiyəni istəməyən qüvvələr və ölkələr davamlı olaraq xarici təhlükələrdən istifadə etməkdədirlər. Son illərdə dünyanın yenidən şəkillənməsində Türkiyənin yeni qlobal güc kimi ortaya çıxması, bu ölkənin güclənməsini istəməyən güclərin hədəfindədir. Həmin güclər bir-birinə qarşı olsa da, Türkiyənin zəiflədilməsi, onun inkişafı və güc kimi ortaya çıxmasının qarşısını almaq üçün bir araya gəliblər. Ona görə də həmin qüvvələr Türkiyəyə qarşı təkcə xarici təhdidlər vasitəsilə deyil, həm də daxildə cəmiyyəti parçalamaq, ölkə iqtisadiyyatında böhran yaratmaqla məkrli planlarını reallaşdırmaq istəyirlər. Həmin güclər "parçala, hökm sür" prinsipinə əsaslanaraq Türkiyənin daxildən cəmiyyəti parçalamağı, barışmaz siyasi qütbləşmələr yaratmaqla buna nail olmaq istəyirlər. Hansı ki biz son illərdə buna şahidlik etməkdəyik.

Həmin güclər yaxşı anlayır ki, Türkiyənin güclənməsi təkcə Türkiyənin beynəlxalq aləmdə güclü oyunçu kimi çıxış etməsi deyil, həm də Türk dünyasının vahid bir güc kimi formalaşması, türkdilli dövlətlərin inkişafı deməkdir. Bu yolla onlar Türk dünyasının inkişaf mərhələsinin və birliyinin qarşısını almağa çalışırlar. Çünki Türkiyə olmadan Türk birliyinin vahid güc kimi formalaşması qeyri-mümkündür.

Digər tərəfdən isə dünyada davam edən geosiyasi və geoiqtisadi dəyişikliklər və bunun nəticəsində Türkiyənin ətrafında yaranan münaqişələr, bunların Türkiyənin təhlükəsizliyinə yaratdığı təhdidlər, dünyada iqlim dəyişiklikləri nəticəsində baş verən su və ərzaq qıtlığı da ölkələr üçün ciddi təhdidlər yaratmaqdadır. Bu getdikcə daha ciddi şəkildə hiss olunacaq.

Ümumiyyətlə, prezident Rəcəb Tayyib Ərdoğan Türkiyədəki mövcud siyasi münasibətləri, yeni qlobal çağırışları, təhlükələri və reallıqları nəzərə alaraq gələcək siyasi sisteminin təkmilləşməsi, həmçinin birliyin təmin olunmasını nəzərə alaraq dialoq başladıb. Hesab etmək olar ki, dialoq sonuc etibarilə Türkiyənin daha güclü dövlət kimi beynəlxalq münasibətlər sistemində oturuşması ilə nəticələnəcək.

Mürtəza
Ölkə.Az