Elman Fəttah: "Seçkiləri pulsuz efir vaxtı verilmədiyi üçün boykot etdik"

Müsavat partiyası dünən seçkiləri baykot etmə qərarı aldı

Müsavat Partiyasının bu qərarı birmənalı qarşılanmadı. Bir çoxları bu qərarı gecikmiş qərar adlandırdı. AXCP Müsavatın bu qərarını sərt dillə tənqid etdi. AXCP-nin sədr müavini Fuad Qəhrəmanlı Müsavat Partiyasının aldığı qərara "Sizə deyəndə ki, seçkidə iştirakın heç bir mənası yoxdur, tələsib sevincək namizədliyinizi verdiniz. 100 illik tarixdən danışıb, meydanda 100 nəfərlə mitinq edəndə anladınız ki, Milli Şuranın qərarı ən doğrusuymuş. İndi dediklərimizə gəlirsiniz, bu da siz sinifdə qalmışlara bir dərs olsun" deyərək münasibət bildirib.

Müsavat Partiyası başqanının müavini Elman Fəttah Müsavat partiyasının aldığı qərarı tənqid edənlərə və partiyanın hansı səbəbdən baykot qərarı almasına Ölkə.Az-da münasibət bildirib:

"Müxalifətin daxilində bir çox funksionerlər var ki, onlar sistemli olaraq müxalif siyasi partiyaların arasında mübarizənin getməsi üçün əllərindən gələni edirlər. Biz isə bunun əksinə çalışırıq. Bu baxımdan belə mənasız, əsassız, ilk baxışdan da intriqaya xidmət edən ittihamları aydın şəkildə gördüyümüz üçün bu cür məsələlərə münasibət bildirməyə lüzum görmürük".

Müsavat Partiyasının seçkilərdən geri çəkilməsinə münasibət bildirən Elman Fəttah dedi ki, "Müsavat Partiyası hələ avqust ayının 29-da Divanın toplantısında seçkidə iştirakla bağlı qərar verdiyi zaman qeyd etmişdi ki, Müsavat Partiyası seçki dövründəki alətlərdən demokratiya uğrunda mübarizəsini fasiləsiz və ardıcıl aparmaq məqsədi ilə seçkilərə qatılır. Məqsəd seçki dövründəki alətlərdən istifadə edərək seçkilərdə iştirak etməkdir. Seçki dövrünün ən mühüm aləti pulsuz efir vaxtıdır. Müsavat Partiyası məhz bu məqsədlə 70-dən artıq dairədən namizədlik irəli sürərək seçkiyə qatıldı ki, bu alətlərdən istifadə edərək mübarizəmizi davam etdirək. 70-dən artıq dairədən, 50 mindən çox imza topladıq, insanlarla görüşdük. Pulsuz efir vaxtını əldə etməyə çalışdıq. Təbliğat-təşviqatın ən fundemantal məsələsi olan pulsuz efir vaxtının verilmədiyi üçün Müsavat Partiyası seçki prosesini dayandırdı".

Qeyd edək ki, Müsavat partiyasının 25 üzvünün deputatlığa namizədliyi təsdiqlənmişdi.

Səxavət Məmməd
Ölkə.Az