Fransanın bölgədə yeni müharibə planı və ya burnunun yenidən “ovulması”
Fransa daima Ermənistanın işğalçılıq siyasətinə dəstək verib, onu Cənubi Qafqazda işğala həvəsləndirən ölkədir. Əgər Fransa o zaman bu siyasətini hansısa vasitələrlə gizlətməyə çalışırdısa, İkinci Qarabağ savaşından sonra bu siyasətini açıq şəkildə həyata keçirməkdədir. İkinci Qarabağ müharibəsinin bitməsində keçən 4 il ərzində Fransanın Cənubi Qafqazı Suriyaya, Ukraynaya çevirmək istiqamətindəki destruktiv səyləri açıq-aydın şəkildə ortadadır. Paris ciddi-cəhdlə çalışır ki, Cənubi Qafqazda münaqişə ocağı yenidən alovlansın. Bu məqsədlə də İrəvana hər cür hərbi dəstək verməyə çalışır. Fransanın İrəvana “Caesar” haubitsaları və digər öldürücü silahlar verməsi barədə imzaladığı müqavilə bunun bariz nümunəsidir ki, bu da regionda yeni münaqişənin yaranmasına xidmət edir.
Bunu Ölkə.Az-a açıqlamasında deputat Kamran Bayramov deyib.
Deputat bildirib ki, Fransa Cənubi Qafqazda sülhə xidmət etməyən kimi destruktiv və qərəzli siyasətinə görə, Azərbaycanın qətiyyətli mövqeyi nəticəsində regional proseslərdən kənarda qalıb. “Regional proseslərdən kənarda qalan Fransanın indiki rəhbərliyi bunu Azərbaycana bağışlaya bilmir və ona görə də pozucu siyasətini davam etdirir. BMT Təhlükəsizlik Şurasının daimi üzvü olan Fransa tərəfindən qanlı hərbi təcavüz törətmək, işğalçılıq təcrübəsi olan Ermənistanın yenidən silahlandırılması, bu ölkədə revanşizm siyasətini dəstəkləməsi, siyasi məsuliyyətsizlik olmaqla bərabər yeni müharibəyə aparan yoldur. Rəsmi Parisin bu destruktiv fəaliyyəti sülh prosesinə ciddi zərbə vurur və regionda gərginliyi daha da artırır. Əgər rəsmi Parisin bu cür destruktiv fəaliyyəti nəticəsində regionda yeni münaqişə baş verərsə, təbii ki, buna görə məsuliyyəti Ermənistanla yanaşı, Fransa da daşıyacaq.
Amma Fransanın istər işğal dövründə, istərsə də işğaldan sonrakı dövrdə bölgədə həyata keçirmək istədiyi çirkin planlar suya düşüb puç olduğu kimi, bundan sonrakı planları da Azərbaycan tərəfindən pozulacaq. Azərbaycan Prezidenti cənab İlham Əliyevin müdrik, uzaqgörən siyasəti nəticəsində nəinki Fransa, ona bu siyasəti həyata keçirməyə şirnikləşdirən erməni lobbisi, anti-Azərbaycan qüvvələr növbəti iflasını və acı məğlubiyyətlərini yaşamalı olacaqlar. Fransanın bizim bölgədə niyyətləri heç bir zaman baş tumayacaq. Əksinə hər dəfəsində burnu “ovulacaq” və istəyi gözündə qalcaq. Amma Ermənistan da anlamalıdır ki, onların nicatı nə Parisdə, nə Vaşinqtonda, nə də hər hansı digər ölkədədir. Ermənistanın və ermənilərin nicatı Azərbaycandadır! Ermənilər və onun havadarları bilməlidirlər ki, Azərbaycanın “Dəmir yumruğu” yerindədir və istənilən təxribata anındaca layiqincə cavab veriləcək. Ermənilər bunu anlamadıqca və ya kimlərinsə əlində alət olduqca, ermənilər hələ çox acılar və faciələr yaşamalı olacaqlar”.
Mürtəza
Ölkə.Az
