Erməni revanşistlər “nokauta” düşdü: daxildə toqquşma və "qurbanlıq keçi" axtarışı 

Keşiş Baqrat Srabazanın liderliyi altında hakimiyyətin istefası tələbi ilə başlanan “Vətən naminə Tavuş” hərəkatı uğursuzluğu göz qabağındadır. Başlanan hərəkat gözləntiləri doğrultmadığından insanların keşiş Baqrat Srbazana və erməni kilsəsinə olan ümidi puça çıxmaqdadır. Bunu erməni kilsəsi və müxalifət də yaxşı görür və anlayır. Sadəcə, vəziyyətdən çıxış yolu axtarırlar. Buna görə də hərəkatın təşkilatçıları "qurbanlıq keçi" axtarışına çıxıblar. Deyəsən, həmin "qurbanlıq keçi" də tapılıb. Bu, "Vətən naminə Tavuş” hərəkatının təşəbbüskarlarından biri, “Demokratik Birlik” Partiyasının sədri Suren Petrosyandır. 

Aksiya iştirakçıları Suren Petrosyanı hakimiyyətlə əlbir olmaqda ittiham edirlər. Onlar hesab edirlər ki, iyunun 13-də Suren Petrosyan hakimiyyət nümayənədləri tərəfindən qaçırılıb və o yoxa çıxdıqdan saatlarla sonra evə qayıdıb. Suren Petrosyan həmin müddət ərzində harada olduğu barədə heç bir açıqlama verməyib.

Etiraz aksiyasının lideri Srabazanın sözlərinə görə, iyunun 13-də axşam saatlarında Suren Petrosyanla qaranlıq qalan həmin hadisədən sonra görüşüblər. "Onunla danışdım, məsələləri ətraflı müzakirə etdik. O mənə baş verənləri danışdı. Mən hər şeyi onun dediyi kimi qəbul etdim, çünki orada nə baş verdiyini bilmirik. Suren eyni zamanda bir neçə günlüyə xaricə getməli olduğunu söylədi. Geri dönüşündən sonra Surenə əslində nə baş verməsi ilə bağlı çoxsaylı suallarımız var. Biz bu yolu birlikdə gedirik, yoxsa yox? Bizdə olan məlumata görə, iyunun 13-də Suren oğurlanmışdı və o bunu təsdiqləməlidir", - Baqrat Srbazan qeyd edib.

Bundan sonra Suren Petrosyanla “Vətən naminə” hərəkatının təşkilatçıları arasında ciddi problemlər yaranıb. Bu hadisə də “Vətən naminə” hərəkatının daxilində ciddi parçalanmaya və inamsızlığa gətirib çıxarıb. Ona görə də təşkilatçılar qarşılarına qoyduqları hədəflərə nail ola bilmədikləri üçün "qurbanlıq keçi" kimi bütün günahları Suren Petrosyanın üzərinə atmaqla vəziyyətdən "duru" çıxmaq istəyirlər. 

Bunu görən Petrosyan da iyunun 21-də mətbuat konfransı keçirib bütün sualları cavablandıracağını bəyan edib. “Mən başa düşürəm ki, hərəkat hədəfinə nail ola bilməyəndə və ya uğursuzluğa düçar olanda günahkarlar, antiqəhrəmanlar və satqınlar lazımdır. Onu da başa düşürəm ki, hamı bunu axtarır, ona görə də sabah mətbuat konfransı keçirib bütün suallara ətraflı cavab verəcəyəm”, - Petrosyan bildirib. 

Bu, bir daha sübut edir ki, ermənilər Azərbaycanla sülhdən yayındıqca itirən tərəf özləri olur. Ermənilər nə qədər ki bunu anlamır, Ermənistanda siyasi, iqtisadi, dövlətçilik böhranı hələ uzun zaman davam edəcək. Bunun da acı nəticələrini erməni xalqı yaşamalı olacaq.

Mürtəza
Ölkə.Az